Bain bain tiha ona haree labarik ho minoridade barak mak lori motor no balun mos lori ona kareta la iha karta kondusaun no nune tau perigu ba sira nia moris rasik, sira nia passajeirus no mos ba ema seluk nia vida bainhira hetan asidente trafiku ruma.“Iha ita nia nasaun Timor-Leste ne’e tuir lolos labarik ho idade minoridade ne’e labele lori motor no kareta halo atividade maibe ami hala’o tuir lei ne’ebe iha katak labarik bele lori motor no kareta bainhira hetan deklarasaun husi inan-aman (fo autorizasaun). Maibe labarik barak mak laiha karta kondusaun ne’eduni ita presiza kria lei espesifiku ida atu nune’e bele regula labarik sira ne’e tanba ita la fo karta mos sira lori,” sujere Xefe Secção Karta Condução, Florentina Bento, semana kotuk (30/01), iha nia knar fatin, Diresaun Nasional Transporte Terrestre (DNTT), Balide, Dili.
Tuir Xefe Bento, DNTT sempre kolabora ho Polisia Nasional Timor-Leste (PNTL) Unidade Polisia Tranzitu atu bele kontrola no prende ema ne’ebe laiha karta kondusaun lori motor ka kareta.
Nia hatutan kona ba labarik ne’ebe ho idade minoridade hetan asidente trafiku bainhira lori motor no kareta, ne’e responsabilidade inan-aman nian tanba sira mak fo autorizasaun no DNTT hein rejistu deit.
Bazea ba Lei Artigu 120 Alina 6 katak labarik minoridade ne’ebe ho didade 17 mai kraik bainhira hakarak lori veiklu tenke hetan autorizasaun husi inan-aman.
“Ba Labarik sira ne’ebe ho idade minoridade seidauk iha karta condusaun maibe lori motor no kareta ami sei aplika multa ba sira. Kazu barak ami hetan ona ami prende sira sai motor no kareta no ami sei bolu inan-aman atu hetan esplikasaun nune’e bele fo atensaun ba sira nia oan. Inklui mos adultu sira ami sei aplika multa ba sira bainhira laiha karta kondusaun,” hatete Komandante Polisia Nasional Tranzitu, Superintendente Antonio L. C. Soares.
Iha parte seluk tuir Membru Parlamentu Nasioankl husi Komisaun A ne’ebe trata asuntu Poder Local e Legislasaun do Governu, Deputadu Rui Menezes katak, Timor-Leste presiza duni lei ida atu regula labarik sira ne’ebe ho idade minoridade ne’ebe lori kareta no motor tanba sira nia idade seidauk to’o atu bele lori motor no kareta, maibe polisia sira bele halo atuasaun hodi trava kedas tanba ne’e relasiona ho ema nia vida.
“Hau nia hanoin ita nia polisia sira liu-liu polisia tranzitu sira atu halo operasaun ba labarik sira ne’ebe ho idade minoridade lori motor no kareta sein iha karta kondusaun ne’e la’os kontra lei ida maibe hanesan regra ida ne’ebe sai hanesan padraun ba rai hotu-hotu,” dehan Deputadu Menezes.
