Hatan ba preokupasaun ne’e Deputadu Paulo de Fatima Martins, CNRT, iha Parlamento Nasional, Dili, semana kotuk (24/1) hateten katak PNTL Distrital tenki iha konbostivel rezerva hodi nune’e labele difficulta aktividade sistema operasional.
“Primeiru komando ne’e rasik tenki antisipa ninian konbustivel. Se konbustivel mai foti iha Dili entaun tenki iha rezerva. Kuandu atu besik hotu ona ne’e nia uza rezerva mais nia tenki mai hola ona iha Dili, sekuandu foti ne’e iha dili. Agora se nia hein ida be’e remata tia mak uza tan rezerva mak nia mai iha dili maka stok hotu tia atu halo nusa,” kestiona mos Deputadu Martins.
Nia hatutan katak, fila fali ba komando ne’e rasik para atu bele halo jestaun ida diak para labele falta konbustivel. Se konvustivel laiha, paralizadu total, ne’ebe fila fali ba komando ninian ninia jestaun operasional no administrativu.
“Sira tenki halo jestaun diak para pur ezemplu hare ba konbustivel menus ona sira tenki halo permohonan [pedidu] tun ona mai antes, labele buat ne’e hotu maka foin prepara surat tun mai Dili. Ida ne’e nasional laos atende komando deit, ne’e duni tenki ho antisipasaun. Pur ezemplu mina ne’e sei to’o ba fulan ida entaun fulan ida antes ne’e nia permohonan tenki tama ona,” haktuir tan Deputado Martins.
Entertantu Komandante Kommando Nasional Operasional, Superintendente Armando Monteiru hateten solusaun ba preokupasaun ne’e iha ona.
“Hau hanoin laiha perkupasaun ida tanba ami nia Intitusaun ne’e halo ona kontraktu ho parte komphania rua hodi fornese konbustivel ba ita nia PNTL iha distritu hotu-hotu,” dehan Superintendente Monteiru.
Superintendent Monteiru dehan tan katak transportasaun konbustivel husi nasional atu ba estasaun atesta konbustivel iha distritu dalaruma tarde tanba ne’e maka difficulta operasional PNTL iha tereno.
“Kadaves transportasaun konvustivel husi nasional ba estasaun atesta konvustivel iha distritu mak dalaruma tarde,” hateten Superintendente Monteiru.
