“Sim uma maternidade balun ne’ebe foin harii konserteza seidauk iha solar sel maibe ita iha ona solar sel hamutuk 47 ne’ebe tama ona iha armazen Ministerio Saúde iha fulan Dezembru tinan kotuk. Ne’ebe iha tempu besik ita halo montajen ba uma maternidade sira ne’ebe seiduak iha maibe sentru saúde hotu-hotu iha se laiha karik aat,” dehan Director Jeral MS, Agapito da Silva Soares, foin lalais (11/1) iha edifisiu MS, iha Kaikoli, Dili.
DJ Soares hatutan katak uma maternidade sira ne’ebe foin harii ne’e latau ho solar sel, balun tau ida ne’ebe ho kapasidade ki’ik entau la sufisiente atu asesu ba lampu hotu entau presiza troka ho kapasidade ne’ebe bo’ot nune’e bele fo asesu hotu ba fasilidade iha uma maternidade.
Iha lidun seluk, Deputada Komisaun F, iha Parlamento Nasional, ne’ebe trata asuntu Saúde, Ilda Maria da Conçeicão, hato’o nia komprensaun katak maske solar sel tama ona iha MS maibe seidauk bele halo monta tanba ministerio sei perkupa ho orsamentu ne’ebe seidauk sai tanba atu halo montasaun mos presiza osamentu.
“Hau komprende tanba kuandu halo montasaun ba solar sel ne’e presiza osamentu tanba agora dadaun osamentu ba implementasaun iha instituisaun seidauk sai. Karik sei sai iha fulan Marsu nune’e sira bele halo ona montasaun solar sel iha uma maternidade sira ne’ebe presiza tebes,” dehan Deputada Conçeicão semana kotuk (24/1) iha Parlamentu Nasional.
Nia hatutan katak problema iha laos falta solar sel deit maibe aimoruk mos kuaze iha Sentru Saúde sira mos laiha tanba ne’e komunidade barak mak sosa aimoruk iha farmasia privadu sira iha liur bainhira hetan reseita husi doutor sira, ne’e hatudu katak iha Sentru Saúde aimoruk laiha.
