“Ami iha suku Bahlaruain [Viqueque] mesak povu agrikultura deit. Ami iha produtu hanesan nu’u, kami, batar no seluk tan inklui mos animal maibe ho kondisaun estrada ne’ebe la foverese atu agrikultura sira lori sira nia produtu ba iha kapital hodi bele hetan osan hodi sustenta sira nia familia tanba preokupa ho estrada. Entau kareta mos selu karun entau sira mate iha fatin deit hanoin atu dezenvolve aan maibe iha impaktu barak,” dehan Chefe Suku Bahalara-uain, Zaques Pinto, semana kotuk (20/1), hosi Distritu Viqueque.
Nia hatutan katak kareta selu karun tanba konbostivel mos kada fulan no loron nia folin sae ba beibeik entau sai inpaktu bo’ot ba povu ki’ik sira atu dezenvolve sira nia moris sai diak liu.
“Sira so tur iha uma deit han hemu deit sira labele buka rendimentu husi sira nia produtu local ne’ebe iha.”
Iha oportunidade ida ne’e Chefe Suku Pinto lori komunidade nia naran tomak husu ba Governu liu hosi nia ministerio Infrastrutura atu bele hadia infra-struktura iha baze hanesan estradas tanba se estrada diak povu iha baze sei lasusar buat ruma.
Iha lidun seluk komunidade Uailalika, Sub-Distritu Uatolari, Manuel Da Costa Amaral, hateten katak sira preokupa kondisaun Estrada iha baze ne’ebe kontinua lafavorese sira labele lori sira nia produtu local ba iha capital hodi hetan osan nune’e bele supporta labarik sira ba eskola.
“Ami husu governu atu hadia ami nia Estrada nune’e ami bele lori ami nia produtu local hanesan nu’u, kami, batar, animal no seluk tan ba iha capital tanba liu husi produtu sira ne’e mak ami bele supporta ami nia oan sira ba eskola,” dehan Komunidade da Costa.
Nia hatutan katak estrada ne’e sira halo reabilitasaun deit maibe la halo estrada permanente entau nia kualidade la to’o durasaun ne’ebe naruk kuandu udan bo’ot estrada kuak fila fali deit.
