Inisiativa Grupu Feto Parlamentar Timor-Leste (GMPTL) atu kria Lei Pornografia hodi proteze feto sira husi hahalok pornografiku lakonsege tanba tempu limitadu no preokupasaun Deputadas ho Eleisaun Jeral 2012.
“Hau hanoin draft [esbosu] Lei Pornografia ne’e sei lahetan fatin iha ajendamentu Parlamentu Nasional tanba iha lei barak mak pendente. Hau hanoin susar teb-tebes maibe oinsa atu ami husik hela draft ruma iha parlamentu ne’e para lejislatura foun ne’ebe mai iha interese no bele ajenda iha plenaria,” hateten Prezidente GMPTL, Deputada Josefa Alvares Soares, semana kotuk (13/01) iha Parlamentu Nasional, Dili.
Tuir Deputada Soares katak lei ne’e importante duni ba nasaun Timor-Leste atu hetan tanba ho nune’e bele proteje feto sira husi hahalok pornografia ne’ebe bele hatun dignidade umana e mos bele lori moras aat.
Maske la konsege ajenda iha 2012, nia hatutan GMPTL sei esforsu nafatin atu organiza enkontru ida entre GMPTL ho Grupu Feto sira atu nune’e bele prepara draft ida hodi bele husik hela iha Parlamentu Nasional e lejislaturan foun bele ajenda iha plenaria.
“Maibe ita bele garantia katak iha ona kodigu penal iha artigu balun hakerek iha ne’eba katak bele kriminaliza ema ka organizasaun sira ne’ebe esplora feto maluk sira nia vida moris hodi hetan persentazen.”
Iha lidun seluk, tuir membru Rede Feto, Filomena Barros dos Reis, katak Timor-Leste hanesan nasaun soberanu ida no nasaun ne’ebe tama ona iha modernalizasaun iha ona teknologia modernu hanesan internet ne’ebe uza livre ne’eduni presiza tebes lei pronografia.
“Hau hanoin importante duni iha nasaun ida soberania ita hakarak nasaun nia moral sae no etika moral ne’ebe importante tanba agora dadaun iha eskola iha de’it edukasaun maibe laiha edukasaun moral entaun ita presiza duni lei ida atu regula duni ema atu labele lori no tau pornografia,” nia dehan.
Tanba ne’e nia husu ba GMPTL maske agora preokupa ho Eleisaun Jeral maibe koko nafatin halao inisiativa ida ne’e atu halo diskusaun iha plenaria maibe karik la konsege mos grupu feto sira ou individual nafatin fo apoiu ba lejislatura foun ne’ebe sei mai nune’e bele debate iha plenaria iha tempu tuir mai.
