Koordenadora Advokasia Forum Komunisaun ba Feto (Fokupers) Honoria Lopes hateten programa ne’ebe sei hala’o iha 2012 mak kontinua fo protesaun ba vitima Violensia Domestika (VD).
“Ami nafatin halo sosializasaun Lei Kontra Violensia Domestika iha distritu hotu,liu-liu ba lider komunitaria sira,atu nune’e sir abele suporta vitima sira hodi ba hato’o keixa iha tribunal,”hateten Koordenadora Honoria Lopes,semana kotuk (11/01) iha Farol, Dili.
Nia hatutan, iha tempu bizavo sira, bainihra mosu violensia domestika ruma, lider komunitariu mak bele resolve maibe agora sira so suporta deit vitima hato’o keixa ba orgaun ne’ebe kompetente.
“Sira labele halo mediasaun ka tesi fali violensia ne’ebe akontese iha uma laran maibe ajuda vitima ba hato’o keixa,” nia katak.
Alende ne’e Divisaun Advocasia Fokupers mos iha programa ida ho naran Jender Respon Base Team (JRB) ne’ebe sei implementa mos iha 2012.
Lopes esplika, programa JRB ne’e atu hare liu kona ba implementasaun orsamentu ba nesesidade feto liu-liu ba igualidade jeneru.
Iha biban seluk, Maria Filomena Babo Martin, Xefe Departementu Formasaun e Educasaun iha Sekretaria Estadu Promosaun Igualidade (SEPI) katak SEPI sei kntinua halo sosializasaun ba lei VD ba iha komunidade sira.
” Tanba maluk feto barak mak seidauk iha konhesementu ne’ebe klean ba lei violensia domestika, iha parte seluk mos tanba lei ne’e nudar lei foun iha Timor-leste, ne’e duni SEPI koopera hamutuk ho organizasaun sira seluk nebe atende mos ba vitima violensia domestika atu halo’o nafatin publikasaun ba lei VD ne’e,” nia dehan.
Alende ne’e tuir nia, SEPI sei halo treinamentu ida kona ba oinsa mak redus ou kontrola hirus ba prizioneirus sira iha Gleno-Ermera no Becora e mos ba joven feto no mane sira.
