Concelho Nasional Juventude Timor-Leste (CNJTL) kopera hamutuk ho UNICEF no Membru Parlamentu Foin Sae’e sei halo konsertu muzika iha 13 distritu hahu iha fulan Fevereiru oin main ho menjasen espesial ba juventude rai laran atu bele tuir elisaun iha ambiente pas no dame nia laran.
“Hau hanoin programa prioridade liu iha fulan oin mai, antes atu tama elisaun Prezidensial nomos Parlamentar iha ne’e Konselho Nasional servisu hamutuk ho UNICEF rasik kolabora hamutuk ho membru Parlamentu Foin Sae’e. Alenede halo treinamentu ba sira
rasik kona ba formasaun elisaun nian, Conselho Nasional mos sei hamutuk ho UNICEF halo programa consertu muzical iha 13 distritu,” dehan Maria Didi Soares Magno, Segundu Vise Prezidente CNJTL, semana kotuk (09/01/) iha nia Knar Fatin, iha Dili.
Tuir nia mos katak objetivu ida hosi konsertus ne’e mos atu liu hosi muzika bele sosializa informasaun kona ba elisaun nian no oinsa populasaun, liu liu juventude, bele halo’o elisaun ho dame.
Planu seluk ne’ebe CNJTL hakarak realiza mak atu halibur Joven Partidu Politiku hotu atu bele asina plataforma ida para bele halao’o elisaun ho dame.
“Plataforma ne’e mak diskute no deside buat balun nebe maka sai hanesan komitmentu para partidu idak-idak ninian wainhira elisaun karik laiha violensia ida, no tenki comprende malu,” dehan Segundu Vise Presidente CNJTL Magno.
Entretanto tuir Vise Presidente Parlamentu Nasional, Deputada Maria Paixao, dehan katak aktividade sira nebe mak organizasun joventude sira halo, hanesan CNJTL, no involve joven sira haneasn consertu sira ou bele suporta sira atu istuda aumenta sira nia kapasitasaun inisiativas ne’ebe diak tebes.
“Durante ne’e iha nia progresu, joven balu mak iha ona konsensia para atu istuda atu kapasita sira nia aan. Ne’e hanesan progresu ida ba organizasun sira ne’ebe mak hare liu ba joventude. Agora mos tenki iha ona aktividade ne’ebe maka muda mentalidade joven sira nebe mak gosta halo violensia iha rai laran,” hateten Vise Prezidente PN Paixao.
Nia mos hanoin katak aktividade juventude barak ida mak sosializasaun atu estabelese pas iha rain laran.
“Tenki iha seminariu ruma atu muda mentalidade violensia iha sira nia laran, tanba ita iha tempu ne’ebe mak hakarak para moris iha dame nia laran,” haktuir tan Vise Prezidente PN Paixao.
