“Ba hau labele taka dalan ba sira, se sira hakarak hela iha Indonesia maibe Indonesia simu sira ka lae ne’e diferenti,” hateten Deputadu Mario Viegas Carascalao, PSD, iha Parlamentu Nasional, Dili, semana kotuk ( 10/1).
Deputado Carrascalao hateten tan katak ba sira ne’ebe mak uluk 1999 komete krime iha Timor hafoin Referendun bele mos mai fali iha Timor-Leste maibe tenki hatan ba Justisa.
Entertantu Deputadu Inacio Moreira, FRETILI, hateten katak Governu tenki hanoin oinsa bele planu ba maluk sira nebe halai ba Indonesia tanba diverjensia politika.
“Tanba ne’e mak hau hakarak Estadu presiza duni tenki halo diskusaun ida ba maun alin sira nebe hakarak atu fila,” hateten Deputado Moreira.
Nia hateten tan katak sekarik eis refujiadu sira balun hakarak fila Estadu tenki kria kondisaun ba sira hodi hela.
“Ba hau hanesan reprezentante povu iha ne’e, hau hanoin ita nia maun alin sira nebe uluk tanba deit diverjensia ideas politikas sira ba neba maibe agora sira hakarak atu fila fali hau hanoin diak liutan.”
Deputado Moreira sublinha mos katak nudar Timoroan tenki simu malu hodi moris hanesan sidadaun bai-bain ne’ebe iha ne’e iha.
“Konaba prosesu judisiariu tenki lao nafatin, ita lalika kahor tanba ida ne’e persija duni. Maibe ba sira ne’ebe mak la komete krime ida ne’e la iha problema ba sira.”
Alende ne’e Deputadu Manuel Tilman, KOTA, hateten katak eis refujiadu Timoroan iha Indonesia la presiza fila mai Timor.
“Hau nia aan rasik hanesan kandidato ba Prezidenti da Republika. Hau nia hanoin karik hau sai duni Prezidenti da Republika sei koalia ho Governu, parlamentu futuru rasik para ita aloka osan ruma hanesan linha kreditu ida depozita hela iha Banku Mandiri para sira fila liman iha neba,” hateten Deputado Tilman.
Nia Mos Depualdo Manuel Tilman n katak se karik sira hakarak fila mai Timor-Leste tenki ba ida-idak nia uma knua fatin. “Se mai nadodon rihun ba rihun hau nia hanoin, sentimentu umanu sira molok to’o Batugade ne’eba, ema balun bele tuda mate sira.”
Tuir Tilman katak, wainhira eis refujiadu hirak ne’e hakarak fila Governu timor mak tenki selu kareta ka aviaun ka roh atu lori sira mai.
“Hau nia politika sira Timoroan prezija moris hanesan Timor, mina rai neba ke ohin loron iha pertense mos ba sira,iha kulpadu ka la kulpadu ne’e kestaun tribunal nian.”
