Tuir informasaun Membru Parlamentu Nasional, Deputada Ilda Maria da Conceição, hetan hosi bolseiru sira husi Ministeriu da Admistrasaun e Ordenamentu do teritoriu (MAEOT) katak boldeiru hamutuk 38 ne’ebe hetan bolsa estudu atu estuda iha Indonesia tenki uza fali sira nia osan rasik atu ba tanba MAEOT la dispoin osan ba sira.
“Sira haruka sira ba ho sira nia osan rasik depois mak sira haruka osan tuir ba,” hateten Deputada da Conceição, iha plenaria Parlamentu Nasional, Dili, foin daudauk.
Deputada da Conceição hateten tan katak orsamentu total ba bolsu estudu ba funsionriu MAEOT atu tuir estuda iha Indonesia 531 Mil Dolares Americano maibe ossan ne’e la konsegue aloka tuir oras bas bolseiru sira.
“Bolseiru hamutuk 38 pessoas ne’ebe mak aranka horiseik [18/12] ba iha Indonesia, balun ba Bandung, balun ba iha Bali, maibe ba ho sira nia osan rasik.”
Entertantu Deputadu Francisco de Araujo katak laos akontese deit iha MAEOT maibe tuir fiskalizasaun Komisaun F nian iha rai liur nota katak bolseiru sira hosi ministeriu balun seluk mos hasoru situasaun hanesan.
“Maibe realidade ministeriu sira mai la esplika klaru ba parlamentu ne’e, katak osan hanesan ne’e ba kada ministeriu ida-idak haruka nia ema ba,” dehan Deputado Araujo.
Deputado ne’e hatutan tan katak iha momentu aprezenta iha parlamentu kuaze 2 Miloens atu koresponde ba nesessidade bolseiru sira nian iha rai laran no mos iha rai liur.
“Ne’ebe ministeriu tenki tau atensaun didiak ba problema ida ne’e, sekarik estudante sira ne’e ba mak uza sira nia osan rasik, ne’e problema ida bele afeita ba sira nia estudu,” haktuir Deputadu Araujo.
TDW koko konfirma asuntu ne’e ba iha MAEOT maibe Ministro Arcangelo Leite la iha fatin atu koalia ho media.
