Programa Servisu Suporta ba Vitimas (Victims Support Service VSS) nudar programa ida ne’ebe bele responde ba feto sira ne’ebe mak hetan violensia domestika iha rai laran.
Programa VSS halao lui hosi koperasaun hamutuk entre organizasoens nasional Justice System Monitoring Program (JSMP), Forum Komonikasi Perempuan (FOKUPERS), no Psychosocial Recovery and Development for East Timor (PRADET).
Prosesu atendementu ba vitimas husi Programa VSS mak atu suporta feto sira atu hetan Justisa ne’ebe justu ne’ebe proteje sira nia direitu no dignidade wainhira hetan Violensia Domestika iha uma kain nia laran.
“Iha tinan 2005 unidade ne’e hari’i atu responde ba nesesidade legal feto sira ne’ebe mak sai fitima, no labarik sira ne’ebe mak sai vitima ba violensia domestika no violensia seksual,” hateten Diretor Ezekutivu JSMP, Luis de Oliveira Sampaio, foin lalais iha nia serviu fatin iha Dili.
Diretor Sampaio mos hateten katak rasaun saida mak JSMP diskobre iha tribunal katak mayoria kazu nebe mak tama ba tribunal involve feto no labarik hanesan vitima ba violensia bazea ba jeneru nian.
“Relasiona ho realidade ida ne’e entaun organizasaun ida ne’e hola inisiativa ida ne’e atu buka hatan ba realidade nebe mak iha vitima nebe mak mayoria iha tribunal maibe sira mos iha kapasidade nebe limitadu atu komunika kona ba sira nia kazu.”
Iha biban seluk Diretora FOKUPERS, Maria Barreto, hateten katak nia organizasaun iha dalan oin oin atu fo suporta ba vitimas violensia domestika no seksual.
“Suporta ne’ebe mak FOKUPER fo maka primeiru FOKUPERS iha shelter ka Fatin Seguru Ba vitima. Wainhira akuntese violensia domestika, sira [Vitimas] la pronto atu fila ba uma entaun sira bele ba hela iha uma mahon ne’e wainhira sira sente hakmatek mak foin bele foti desizaun,” dehan Diretora Barreto iha knar fatin iha Dili, foin lalais.
Diretora Barreto mos hateten katak durante sira nia tempu iha shelter FOKUPERS iha aktividades nebe maka halao ba vitima sira hanesan aktividade kounseling individual nomos kounseling grupu ba vitima sira atu koko hadia sira nia trauma no mos atu koko reabilita sira nia espiritu.
“Liu husi prosesu konseling sira senti katak hakmatek no hakarak fila ba familia entaun FOKUPERS sei fasilita sira,” haktuir Diretora Barreto.
