Sekretaria Estadu ba Sekretaria Promasaun Igualidade (SEPI), Idelta Maria Rodrigues, hateten ba tinan 2012 presiza esforsu bo’ot liu tan hodi promove igualidade jeneru iha Timor-leste (TL).
“Hau espera katak iha tinan foun 2012 ita bele kopera hamutuk atu halo promosaun
igualidade diak liu tan. Tinan ida ne’e especial oituan ne’e duni ami konvida organizasun sira seluk atu nune’e ita bele fo liman ba malu no halo reflesaun ba saida mak ita halo ona durante ne’e e saida mak ita seidauk halo e saida mak ita tenke halo iha tinan 2012 ne’e,” hateten SE Rodriques bainhira hala’o Boas Entradas tinan foun ba organizasaun parseiru sira hanesan FOKUPERS, PRADET, UNMIT no organizasaun sira seluk iha Salaun Delta Nova, Dili, semana kotuk (04/01).
SE Rodrigues hatutan katak iha 2012 sei iha eleisaun boot rua Presidensial no Lejislativa tanba ne’e presiza ema hotu nia kontribuisaun hodi kria kondisoens ne’ebe diak, ho demokrasia, paz no estabilidade.
“Ne’e duni mai ita feto ka mane, ita kopera hamutuk au bele kria kondisoens ne’ebe diak iha ita nia rai laran,” nia dehan.
Entretantu tuir Vise Reprezentante Espesial Sekretariu Jeral (SRSG) Missaun Nasoens Unidas nian, UNMIT, Fin Rieske Nielsen, katak progresu barak mak SEPI halo ona durante tinan 2011.
“Hau hare iha tinan 2011 progressu barak tebes iha SEPI, hau espera katak iha tinan 2012 maluk feto sira, liu-liu SEPI, bele ho esforsu maka’as atu kopera hamutuk no bele servisu diak liu tan iha tinan ida ne’e,” Vise SRSG Nielsen esperansa.
