“Ami nia programa ne’ebe mak lao ona ami halo assessment [evaluasaun] iha distritu lima ona. Ami halo iha Oe-cussi, Ermera, Lospalos, Baucau ho Dili; ami buka vocal point tamba ne’e ami nia tinan primeiru, ami servisu iha distritu lima deit. Distritu lima ne’e ami laos loke kantor mais ami hanesan servisu hamutuk ho vocal point, distritu ida vocal point ida deit. Vocal point nia funsaun atu buka dadus deit,” dehan Jessica Sequeira nudar Kordenadora WWCTL iha nia Knar fatin, Dili, semana kotuk (06/01).
Kordenadora Sequeira afirma tan katak, WWCTL bele mos akumula levantamantu kona ba feto ne’ebe servisu ne’e hira no dezafius saida mak maluk feto sira hasoru durante servisu.
“I durante maluk feto sira servisu hetan kontraktu ka lae. Ne’e maka sai servisu husi WWCTL atu atende ba maluk feto sira nia dezafius durante servisu nudar Domestik Workers, no iha parte seluk tamba WWCTL antes Natal fo workshop ba vocal point sira,” dehan Kordenadora Sequeira.
Iha biban hanesan Program Assistant APHEDA (Union Aid Abroad APHEDA), Ana Mariano, ne’ebe mos nudar fundadora ida ba WWCTL fiar katak organizasaun ne’e nia knar importante los.
“Hau hanoin katak organiasaun ne’e diak tamba atu hakbiit feto iha area Domestik Workers atu bele ajuda maluk feto sira oinsa sira nia direitu, oinsa sira nia dever tanba durante ne’e ita hare katak domestic workers barak mak mai ne’e sira servisu kuandu iha problem maka sira infrenta iha sira nia servisu fatin sira seidauk hatene atu ba iha nebe para bele lori sira nia problema sira ne’e.”
Nia mos fiar katak ho estabelesementu WWWC bele ajuda maluk feto sira ne’e hetan suporta no resolve sira nia problema.
