Prezidenti Comisaun Nasional para as Eleições (CNE) hateten katak CNE seidauk fo sai kalendariu ba partidu politiku sira (ParPol) atu halo kampanha ba Eleisaun Jeral 2012 tanba Prezidenti da Republika seidauk fo sai loron Eleisaun ninian monu iha sa loron.
“To’o ohin loron Prezidenti da Republika seidauk dekreta sai,” hateten Prezidenti CNE Dr. Faustino Cardoso, iha sala konferensia Sentro Konvensoens Dili, semana kotu (14/12).
Persident CNE Cardoso hateten tan katak iha Prejidenti nia diskursu iha sala konferensia Sentro Konvensoens Dili hateten katak iha loron 15 Dezembru nia halo sorumutu ida partidu politiku sira hodi rona antes nia desidi loron konaba eleisaun ninian.
“Hahu husi ne’e mak foin sai kalendariu I bazeia ba kalendariu partidu sira bele halao kampania tuir periodo nebe mak Eleisaun ida-idak ninian iha.”
Prezidenti CNE Cardoso informa katak ba eleisaun prezidensial ninian iha loron sanulu resin lima para ParPol sira bele halo sira nia kampanha maibe tenki remata molok tama ba loron votasaun.
No ba eleisaun parlamentar bele halo kampanha ba loron tolu nulu no tenki remata loron rua molok tama ba loron votasaun.
Iha fatin seluk Deputadu Bankada Partidu Unidade Naional(PUN), Domingos Mesquita, hateten katak to’o agora CNE seidauk fo sai kalendariu ba sira atu halo kampania ba eleisaun 2012.
“Hau hanoin partidu hotu-hotu sei hein to’o Janeiru hanesan ne’e mak foin aktividade kampanha nian lao.”
Deputado Mesquita dehan tan katak bazeia ba regulamentu husi CNE mak foin fo ba partidu politiku sira criteria saida mak sei halo iha tempu kampania.
“Hau hanoin momentu ida ne’e partidu politiku focus liu ba konsolidasaun maibe sei kahor oituan konaba konsolidasaun ho kampania.”
