“Ita komesa husi tinan ida ne’e, ADB komesa husi projetu estrada ne’ebe mak ohin ami koalia, husi Loes ba to’o iha Batugade. Batugade ba Maliana ida ne’e foin mak tinan ida ne’e atu komesa. Ida mak area konaba be mos nian. ADB sei suporta Governu atu melhora sistema hadia be mos nian iha zona tolu iha Dili atu komesa. I mos sistema hadia be mos iha Pante Makasar Oe-cuse no mos Manatutu. No ikus liu mak treinamentu vokasional,” hateten Craig Sygden, Reprezentante ADB iha Timor-Leste, iha edifisiu ADB Lesidere, Dili, semana kotuk (12/12).
Reprezentante Sygden hateten tan katak orsamentu ne’ebe atu halao projetus sira ne’e mak inklui ba proijektu iha hadia be mos iha Pante Makasar no Manatutu orsamentu hamutuk $11 Milhoens, projetu be mos iha Dili orsamentu $6 Milhoens, no ba halo estrada hamutuk $46 Milhoens.
“Maske fundu ne’e mai husi ADB maibe Governu mak sei ezekuta no Governu mak sei implementa,” nia haktuir.
Hosi parte ADB maske Governu mak sei ezekuta orsamentu atu implementa projektus hirak ne’e, ADB sei servisu hamutuk ho Governut atu halo monitorizasaun no supervisaun servisu ne’ebe halao atu garante katak tuir padrao internasional ne’ebe ADB aplika iha nasaun hotu-hotu ADB fo suporta.
Entertantu Prezidente Komisaun G, Parlamentu Nasional, Pedro da Costa, ne’ebe trata asuntu Infrastrutura hateten katak, ADB sei halo planeamentu no halo supervijasun no mos halo monitorizasaun ba projetu sira ne’ebe valor bot.
“ABD komesa servisu dadauk ona fo prioridade ba estradas nebe mak presiza tenki hadia uluk, purezemplu Estrada Dili ba Liquisa, Dili ba Aileu, Maubise, Ainaro, Same, Tibar ba Ermera, Dili ba Baucau.
