Membru Parlamentu Nasional, Deputado Aderito Hugo hateten katak, povu nia osan ne’ebe rai iha Banku Mandiri lakon hosi sira nia konta bankaria tanab banku la fo seguransa ba povu nia osan.
“Hau foti ezemplu saida mak mak akontese. Iha funsionario Banku Mandiri ninian ne’ebe horiseik no hodi bainrua sai,” hateten Deputadu Hugo iha plenaria Parlamentu Nasional, Dili, semana kotuk (13/12).
Deputadu Hugo hateten laos akontese iha Banku Mandiri deit maibe mos Banku Nasional Ultramarinu no mos Banku ANZ ne’ebe iha instansias ema nia osan mos lakon konta bankaria.
“Kaju hanesan ne’e taka hela deit iha banku nia laran, tan ne’e mak hau aproveita oportunidade ida ne’e tanba agora ita iha ona banku sentral hanesan autoridade reguladora atu hare kestaun sira ne’e.”
Alende ne’e Deputadu Elizario Pereira hateten mos katak osan povu nian mak tau iha banku la seguru tenki tau atensaun duni.
“Sigundu fontes ida mak ami simu katak Banku Mandiri simu depozitu mai husi 43 mil pesoas ema Timor oan depozita iha neba. Maibe la sirkula osan ne’e liu husi kreditu iha Timor. Osan ne’e sirkula iha rai seluk atu heta jurus ne’ebe bot,” tenik Deputado Pereira.
Deputado Pereira sujera ba meza parlamentar atu rekomenda ba Komisaun kompetente atu bolu jestor Banku Mandiri atu hasoru ho Komisaun atu nune’e bele fo informasaun ne’ebe diak ba parlamentu atu akompanha.
Deputado ne’e nos preokupa tanba nia rona Banku Mandiri agora haruka sai funionarius arbiru deit.
TDW koko ba intervista jestor Banku Mandiri no Banku Nasional Ultramarinu (BNU) maibe la konsege tanba chefi nain rua ne’e la iha fatin atu koalia ho media.
