Atu garante estabilidade no seguransa, paz no dame durante Elisaun Jeral 2012 Asosiasaun Hak halao seminario nasional ida ba lideransa partidus politikus, joventude, Estado no komunidade balun ho tema “Elisaun Ne’ebe Justu Tuir Prinsipiu Demokrasia ho Perspektiva Direitus Humanus” atu fo hanoin hikas fali ba stakeholders hirak ne’e atu hatudu komitmentu no fo kontribuisaun ne’ebe forte atu bele garante Eleisaun iha tinan foun bele realiza ho susessu.
Hak nia preokupasaun tanba iha tinan 2012 sei iha eleisaun rua atu hili Prezidente foun no mos Lejislativu no Exekutivu foun ba nasaun Timor-Leste.
“Hak realiza seminario ne’e tanba Hak iha preokupasaun ida ho razaun Tinan 2012 ita halo komemorasaun loron indepedensia Timor–Leste ba dala 10. Alende ne’e mos Festa Demokrasia liu husi prosesu Elisaun Jeral, no misaun ONU nian mos sei ramata iha ita nia rai. Entau ho eventu ida ne’e bele dezafia fila fali ita nia Estado, komunidade, no lideransa partidu politikus sira hotu atu refirma fila fali ita nia prinsipiu atu mantein paz dame no seguransa ne’ebe diak hodi bele garante dezenvolvimentu nasaun Timor-Leste iha futuru ho susesu,” hateten Director Ezekutivu Asosiasaun Hak, Rojeiro Veigas Vicente, semana kotuk (15/12) iha Salaun São Paulo, Comoro, Dili.
Nia haktuir tan katak Elisaun Jeral hanesan pilar importante ida ne’ebe determina Demokrasia no bele sai mos instrument politiko hodi implementa povu nia hakarak atu hodi hili nia reprezentante ne’ebe atu tur iha Parlamentu Nasional no mos Prezidente mak sira hakarak hili.
“Povu iha direitu livre atu hili no fo votus tuir nia hakarak no konsensia labele hili tanba iha presaun politika, fizika no psikolojika ne’e labele. atu garante dezenvolvimentu nasaun nian ne’ebe sustentavel, elisaun tenke transparansia no demokratika,” hateten Prokurador Silveiro Pinto Baptista, nudar orador iha serminariu ne’e.
Iha lidun seluk Jose Luis de Oliveira, Diretor Ezekutivu organizasaun JSMP nudar orador mos koalia konaba topiku elisaun hosi perspetiva povu hateten katak nia parte perkupa tebes ho lei elisaun foun ne’ebe iha katak atu halo elisaun jeral maibe iha regras ida ho karakter elisaun suku.
“Hau Perkupa tebes ho lei elisaun agora dadaun ne’e ita dehan atu halo elisaun jeral maibe iha regras ida ke iha karakter hanesan fali elisaun suku, ne’e kontra Vitoria ho prinsipiu sufrajio universal. Signifika ema ne’ebe tama ona kriteria atu tuir elisaun nia bele tuir iha ne’ebe deit laos atu tuir fali iha suku ne’ebe hakerek iha karatau elitoral ne’e tanba nia atu hili lideransa nasional laos lideransa suku,” hateten orador Oliveira.
