Realidade ohin loron iha Timor-Leste feto barak mos involve iha aktividade negosiu ka bisinis no sai Emprezaria Feto ho nune katak feto mos fo kontribuisaun makas ba nesesidade uma laran nomos ba dezenvolvimentu sector bisnis iha rai laran.
“Hau orgulho ba kriasaun Feto Imprezarial iha Timor-Leste ne’ebe mak ita hare katak iha movimentasaun nebe mak maka’as ne’e hatudu ona pasu importante ida ba feto sira katak atu hakbi’it feto sira iha vida ekonomia durante ne’e iha esforsu maka’as husi parte hotu mai be iha momentu ne’e ita tengki orgulho” dehan Deputada Gertrudes Moniz, PD, iha Parlamentu Nasional, Dili, semana kotuk (15/12).
Nia mos hatutan katak agora iha ona konsiensia maluk feto sira halibur aan iha grupu emprezarial no inklui iha vida bisnis mos katak hahalok sira ne’e hatudu dezenvolvimentu no laos iha Kapital Dili maibe iha subdistritu sira mos komesa ona grupu emprezaria feto ne’ebe mak hetan projeitu inklui mos kompanhia ne’ebe mak feto sira hari’i.
Iha fatin hanesan Deputada Benvinda Rodrigues, CNRT, hateten katak “hau hare iha tempu agora feto maluk sira inklui iha vida bisnis iha ita nia rain Timor-Leste diak tebes, no sira iha loyal no sira berani halo kompitisi ho maluk mane sira iha vida bisnis.”
Deputada Rodrigues sublinya liu tan katak maluk feto sira ne’e hatudu mos sira nia kapasidade katak sira mos bele halo buat sira nebe maluk mane sira halo liu-liu iha area vida bisnis. Sira mos bele hatudu ona katak sira mos bele sai Chefe ba sira na kompanhia rasik.
“Iha parte seluk sira mos halo konstruksaun hanesan mos maluk mane sira, ne’e progresu nebe diak.”
Iha biban seluk Agustina Soares nudar ema nebe halao’o nia bisnis kona ba Tais, haktuir katak halao bisnis la os buat ida foun ba feto Timoroan.
“Ami halao bisnis ida ne’e husi kedas uluk, hahu husi ami nia inan aman to’o fali ami. Hau hala’o bisnis ida ne’e hodi ajuda nesesidadae uma laran no ajuda hau nia laen atu kontribui uma laran nian,” hateten Feto Emprezaria Soares.
