Sentimentu tur hakmatek mak sentimentu ne’ebe ema hotu buka liu liu feto iha Timor-Leste ne’ebe buka moris la iha preokupasaun boot ba sira nia moris lor loron nian. Sujestaun ba feto maluk sira mak tenki buka meius atu sente barani foti desizaun no forsa bainhira hasoru dificuldade iha sira nia moris lor loron nune’e bele sente hakmatek.
Tuir Filomena Barros Reis nudar lider feto servisu iha area harri dame no paz no iha seguransa hato’o nia sujestaun katak feto sira presiza iha pontu ida rekuinehse frakeza ne’ebe ita iha katak nudar ema iha frakeza tanba laiha ema ida moris perfeitu. Tuir fali segundu pontu feto hotu-hotu tenki sai lider ba oan sira no presiza hatudu exemplu diak ba oan sira.
“Ita hakarak sente hakmatek ita tenke pronto simu rekonsilia ita nia aan [frakeza] ne’ebe ita iha no buka oinsa atu fahe frakeza ne’ebe ita iha ho maluk sira seluk buka atu hadia,” dehan Filomena Barros Reis, foin lalais iha edifisiu CAUCUS, Maskarinas, iha Dili.
Parte ida mos presiza kria servisu ba aan rasik katak kria servisu atu bele halibur komunidade sira iha bairo laran no involve aan iha organizasaun ne’ebe iha bairo laran.
Iha lidun seluk Luiza Marcal nudar Kordenadora Uma Hakmatek hato’o nia ideias katak presiza harii unidade no paz iha familia no ba ema hotu hanesan. Pontu ida mak harii unidade no paz iha familia katak familia uma laran tenke moris iha dame no paz nia laran.
Nia hakruit mos katka feto presiza buka hado’ok aan husi hahalok aat no hosi hanoin aat ba sira. “Nune’e mos bainhira problema iha buka atu resolve ho diak labele ho nervosu tanba bele mosu konflitu bainhira ho nervosu no ita nia moris sei lahakmatek bainhira moris iha problema laran.”
Iha lidun seluk Jerente Programa Advokasia iha Fundasaun Alola, Alzira Reis, hateten katak sujestaun ba feto maluk sira mak aproveita tempu ne’ebe iha atu hetan edukasaun no formasaun ne’ebe diak tanba edukasaun mak pilar importante ba dezenvolvimentu nasaun no futuru pessoal.
“Tenke atenbrani atu foti desizaun ba sira nia moris nune’e bele fo vantagen diak ba sira nia moris,” hateten Jerente Reis.
