Rejultadu fiskalizasaun nebe Membrus Parlamentu sira halao ba Distritu Liquisa, Suku Kaiteu hatudu ahi han fiu linha eletrisidade nian sai naben no halo komunidade iha area neba labele uza eletrisade tanba jerador nebe mak horas ne’e dadauk uza forsa makas liu duke kompara ba uluk ninian.
“Hau lamenta tebe-tebes maske ita bele dehan ahi ne’e lakan vinte kuatru horas mas kazu barak mosu ona. Iha Liquisa horseik (4/12) mosu ona fiu lubuk ida ahi han tan tiha,” hateten Deputadu Francisco Jeronimo, FRETILIN, iha Parlamentu Nasional, Dili, semana kotuk (5/12).
Deputado Jeronimo dehan tan katak iha akontesementu foin lalais ne’e nia uma rasik kuadru Eletrisidade uma nian mos sai naben no ahi han tiha. “Sorte loron be ami atende tiha, kalan karik kuitadu uma ba tiha ona.”
Wanhira Deputadu ne’e bolu, funsionario EDTL Distritu Liquisa nian maibe to’o iha fatin akontesementu ne’e maibe sira lahatene.
“Ita ba bolu sira dala ruma to’o horas rua mak foin mosu mai, maibe mosu mai ida rua nebe la komprende tan ahi,” dehan Jeronimo.
Nia husu ba Sekretariu Estadu Eletrisidade agua I Urbanizasaun, Januario Pereira, atu kontrola ba ahi sira iha hodi nune’e povu kik labele sai vitima.
Entertantu Vise Prezidenti komisaun G, nebe trata asuntu Infrastrutura, Deputadu Inacio Moreira, FRETILIN, hateten katak akontesementu ne’e laos Liquisa deit maibe iha Kintal Bot mos iha semana kotuk sirkuit ahi ahan uma iha ne’eba.
“Deputadu ohin hateten iha sigundu dia deit iha Liquisa, inklui iha deputadu ninia uma,” Inacio dehan.
Nia hateten akontesementu ne’e akontese tanba impaktu husi normalizasaun.
“Uluk hau hateten bebeik, se hakarak ahi ne’e labele iha interupsaun katak, labele mate lakan, linas ezistenetes ne’ebe iha tenki ser normaliza hotu, liga fali fiu sira ne’e ho estandar hafoin uza,” hateten Deputado Moreira.
Wainhira TDW koko konfirma asuntu ne’e ba iha Sekretariu Estadu Eletrisidade Agua e Urbanizasaun maibe nia la fo tempu atu koalia ho media.
