Iha Konstituisaun RDTL hateten katak, loron 7 Dezembru loron historiku ba Timor-Leste hodi halo nia komemorasaun iha tinan-tinan maibe familias hosi vitima sira deit senti katak sira marka loron ne’e mesak tanba Estadu la iha partisipasaun maximu iha komemorasaun loron historiku ne’e.
“Loron 7 Dezembru ohin ba tinan tolu nulu resin nen (36) atu hanoin hikas fali ba loron 7 Dezembru Indonesia mai Timor-Leste,” hateten Atai Monis, nudar Pontu Focal ba Grupu 10 Junhu Trajedia Marabia, iha Jardin 5 de Maiu, iha semana kotuk (7/12).
Reprezentante Monis hatutan tan katak nia grupu halo programa simboliko ida ne’e para oinsa bele hatutan informasaun ba jerasaun Timoroan foun sira atu la bele haluha loron historiku ne’e.
“Ida mos ami hanoin hikas fali para hare ba matebian sira nebe mak la iha rate oinsa atensaun Estadu nian ba ida ne’e, tanba ema sira ne’e uluk vitima tiha ona, ita ukun an tiha ona maibe vitima tan ba dala rua,” dehan tan Reprezentante Monis.
“Liu-liu ita hare ba ita nia inan feto sira, uluk okupante nebe mai viola sira tau tan oan, depoir sira terus ida ne’e la konsege rezolve iha sira nia uma laran. To’o ita ukun aan sira nia oan sira ba husu atu halo sertidaun RDTL susar tanba aman la iha.”
Entertantu reprezentante Asosiasaun da Vitimas Distritu Dili, Maria Gloria, hateten katak loron komemorasaun 7 dezembru ne’e oinsa bele relembra fila fali konaba invasaun Indonesia mai Timor-Leste tanba halo Timoroan barak hetan mate no terus ba rai ida ne’e.
“Ami husi Asosiasaun das Vitimas no mos husi JIZ nebe mak ajuda ami atu fo hanoin fila fali sofrimentus nebe mak akontese iha 7 de Dezembru [19750,” hateten Reprezentante Assosiasaun Gloria.
Nia hatutan tan katak Estadu Timor-Leste iha Governu Konstitusional ba dala hat ona maibe la fo konsiderasaun ba vitima sira nebe mak durante ne’e sira terus to’o ohin loron terus nafatin.
“Ami halo ida ne’e atu afanun Governu atu hakuak ba ema sira nebe terus, no familia sira nebe lakon, ruhin lahuk, ran nakfakar atu hetan Independensia,” hateten Reprezentante Gloria.
