Escola 5 Maio Dili sei nafatin hein governu liu hosi Ministerio da Educasaun atu rehabilita eskola nia fasilidades atu aumenta kualidade aprendizajem estudantes sira, maske tinan tinan orsamentu atu reabilita eskola iha rai laran aprova hela.
“Wainhira udan mai be tama to’o sala laran. Depois ami nia eskola mos falta meza no kadera, nomos kaza de banho la sufisiente para ami uza tamba aat,” hateten estudante Maria Freitas iha semana kotuk (23/11), iha Eskola 5 de Maiu, iha Becora, Dili.
Tuir estudante Freitas mestri sira dala ruma la tama halao aktividade aprendizajen, entau ne’e fo impaktu ba sira tamba material balu nebe atu tama ba ezame trimestre sira la fo hotu.
Estudante Freitas mos hatutan katak, sira nia plafon mos at, nomos kanu nebe mak kiik dala ruma mos fo impaktu ba sira wainhira udan mai, kaza de banhu nebe mak aat halo estudante sira mos tengki ba impresta ba komunidade sira nia uma ne’ebe besik eskola.
Iha opotunidade ne mos Director Eskola 5 de Maiu, Manuel Verdial, hateten katak hosi sira nia parte hatama ona proposta ba iha governu maibe seiduak hetan rezultado.
“Ami halo ona proposta ba governu mais seidauk hetan rezultadu. Eskola sira seluk hetan ona rehabilitasaon maibe ami nia eskola ne to’o agora seidauk hetan,” hateten Diretor Verdial.
Nia hatutan katak, hare ba condisaoes sira ne’e halo mos estudante balu baruk atu mai eskola. Nomos mestri sira baruk atu halao aprendizajen no pior liu mak kaza de banhu agora sai fatin bibi nian.
Diretor Verdial hateten ba govenu liu-liu Ministeriu Educasaon atu bele atende situasaun hirak ne’e tamba tuir sira ne’e diskriminasaon, tamba eskola sira seluk hetan ona rehabilitasaon maibe sira seidauk hetan to’o agora.
