Tuir Matenek-nain Nasoens Unidas nian (ONU), Magdalena Sepulveda, iha Timor-Leste feto hasoru diskriminasaun estrutural historiko no Timor-Leste tenki adota medidas signifikativu no komprensivo hodi hametin feto sira nia direitu hanesan mane.
“Objectivo hanesan ne’e; Estadu tenki foti medida apropriadu hodi halakon deskriminasaun no pratika kostumario ka oin seluk ne’ebe sobu sub-subar feto sira nia hakarak ba direitu tuir Konvensau kona ba Eliminasaun Diskriminasaun Hasoru Feto sira [CEDAW],” hateten Matenek-nain ONU nian Magdalena Sepulveda, semana (18/11) iha Sede Jeral UNMIT, Obrigado Barracks, iha Dili.
Tuir Matenek-nain Sepulveda feto sira iha direitu hanesan ba Ai-han, Saude inklui Saude Sexsual no Reprodutiva, Educasaun no Asesu ba Justisa ne’ebe tenki hadia tiha.
Tuir nia mos katak problema grave ne’ebe feto sira hasoru iha rai laran mak Violensia Domestika no tuir nia hanoin mos, kazu Violensia Domestika la bele rezolve tuir dalan mekanismo justisa tradisional ne’ebe mak sai hanesan violasaun ba norma no padrao Direitus Humanos Internasaional.
“Ho hanoin ida ne’e maske hau louva adopsaun ba Lei Hasoru Violensia Domestika [2010], no desizaun Violensia Domestika nian nudar krime publiko iha okos Kodigo Penal 2009 , esforsu liu tan tenki halo hodi hametin implementasaun ba lei ida-idak ne’e.”
Entretantu Gilberta Freitas nudar komunidade ida hateten katak realidade ne’ebe iha iha Timor-Leste hatudu momos duni katak feto laiha direitu atu asesu ba educasaun no mane deit mak iha direitu atu asesu ba educasaun.
“Hau sente triste tamba bainhira remata tiha iha ensino secundario hakarak atu ba kontinua iha Universidade maibe hau nia inan-aman laiha forsa atu suporta tan hau ba oin,” nia dehan.
Nia haktuir katak tuir kostume Timor nian katak feto escola to’o deit iha ensino secundario deit labele kontinua ba oin ba Universidade tanba ho idade ne’ebe atu hola mane entaun inan-aman sira prefere sira nia oan feto hola mane deit doke aumenta tan edukasaun.
