Fundasaun Mahein (FM) rekomenda ba Governo atu fortifika Unidade Polisia Komunitaria liu liu kona ba asaun prevensaun konflitu tamba tensaun no paniku hamossu iha komunidade wainhira hare prezensa membru PNTL uza kilat boót ho farda verde no pior liu tan ho meus operasaun dala barak hamosu fila fali violasaun Direitus Humanos durante periodu operasaun.
“Relatorio ne’e Fundasaun Mahein deskonkorda ho politika komando Polisia Nasional Timor-Leste ne’ebe durante ne’e uza meus operasaun hodi halo atuasaun ba kualker tipu de problemas no operasaun 88 iha sub Distritu Quelcai foin lalais ne’e,” hateten Director FM Belo semana kotuk (15/11) iha nia knar fatin, iha Balide, Dili.
Tuir Director Belo politika Komando PNTL ne’ebe realiza operasaun hirak ne’ebe akontese iha Sub-Distritu Queleqai ba akontesimentu ne’ebe laos krime bo’ot ne’ebe presiza atu uza kilat ka forsa, tamba bainhira halo atuasaun ho uza forsa ne’ebe bo’ot, uza fasilidade barak no gasta orasamentu barak.
Tuir nia tan FM sujere katak Governo presiza fo prioridade ba dezenvolvimentu polisia komunitaria, no laos deit Unidade polisi komunitaria maibe oinsa polisia iha teritorio tomak bele hamutuk ho komunidade hodi prevene konflitus.
“Fundasaun Mahein husu iha futuro Polisia Nasional Timor-Leste tenke limita atu uza forsa hodi hasoru krimi ki’ik atu minimize violasaun direitu humanos hasoru komunidade.”
Iha parte seluk komandante operasional Eugenio Pereira hateten katak Fundasaun Mahein iha ninia hanoin ida ne’ebe positive atu bele hare ba iha situasaun ida ne’ebe diak liu “Hau hanoin diak liu husu Fundasaun Mahein atu bele halo ninia observasaun atu identifika didiak realidade ne’ebe ke ita nia komunidade sira infrenta iha area rurais sira ou area ida ne’ebe polisia halo operasaun,” hateten Komandante Pereira.
Tuir Komandante Pereira iha ne’eba polisia halo ninia intervensaun la halo paniko ba komunidade maibe kria fali situasaun ida ne’ebe halo povu kontente tamba presenza polisia nian.
Realidade “Ami hare katak povu la paniko ho presenza polisia nian maibe povu sente orgulho, povu sente iha ninia sentimentu ida ne’ebe nakonu ho konfiansa iha ninia moris tamba nia sente katak nia sente moris duni iha ambito ida ne’ebe ke seguru duni ba nia a’an,” Komandante Pereira hateten tan.
