Deputada Fernanda Borges, PUN, alega katak Secretaria do Estado Promosaun Igualidade (SEPI) la fo apoiu ba grupu feto balun, tanba tuir Deputada ne’e dala barak Organizasaun Naun-Governamental (ONG) no Grupus Sosiedade Sivil (CSO) ne’ebé harii husi feto maluk sira sempre ba iha Parlamentu Nacional hodi husu feto Deputada sira fo suporta ba sira nia aktividade iha baze.
“Wainhira NGO Feto sira ne’e mai hasoru hau, sira husu hau nia ajuda ba sira nia aktividade. Hau haruka sira ba iha Secretaria do Estado Promosaun Igualidade, maibé Secretaria Idelta Maria Rodigues hateten laiha orsamentu, ida ne’e hatudu katak SEPI la fo apoiu ba aktividade feto sira nian,” katak Deputada Borges, semana kotuk (16/11) iha Parlamento Nacional, Dili,.
Konaba grupu feto ne’ebé mak harii ona iha rai laran nudar CSO, tuir Deputada Borges sira ba husu Feto Deputada sira atu fo apoiu ba sira nia grupu tanba nudar grupu osiedade sivil sira labele hetan osan no mos SEPI laiha verba iha nia orsamentu.
Deputada Borges kestiona servisu SEPI ho Assessor Sosiedade nian atu asegura netik feto sira ne’ebé mak presiza duni osan oituan atu azuda sira fortalese no kapasitasaun ba sira hodi halao sira nia aktividade, dala barak iha area be’e mós nian, aihan, hare labarik inklui mós kontra violensia, buat ne’ebe importante tebes SEPI la fo apoiu ba ho razaun osan laiha deit.
“Entaun hau hanoin ita tenki tau matan ba buat sira ne’e, selae ita la ajuda feto maluk. Sira atu husu ajuda ba tan se? Saida mak Secretaria do Estado Promosaun Igualidade halao ona ba feto maluk sira?”
Hatan ba preokupasaun ne’ebe Deputada Borges foti iha Parlamentu Nasional, Secretaria do Estado (SE) SEPI, Idelta Maria Rodigues hateten katak orsamentu SEPO la os kobre deit ba nivel nasional maibe kobre mos ba nivel internasional.
Nia hatutan tan katak Timor-Leste iha reprezentante iha CEDAW (Konissaun ba Elininasaun Diskrimiasaun Hasoru Feto), Milena Pires, iha Nova York, Amerika, no nia mos presiza apoio hosi SEPI.
“Hau hanoin katak nia [Reprezentant Tl ba CEDAW Pires] halo tiha ona ninia servisu iha Genebra foin dadauk ne’e. Ita presija mós apoiu finaseirus atu nia bele halo ninia aktividade portantu iha nivel nasional inklui mós internacional. Hau rekonhese mós iha difikuldade balun mós afeita ba ninia servisu, tanba ne’e mak SEPI laiha orsamentu, maibé atu husu ba Deputadus sira osan ne’e mai husi ne’ebé,” katak SE Rodrigues.
Konaba apoiu ba NGO noa CSO Feto iha railaran SE Rodrigues hateten katak nia Ministeiru sempre halo apoiu ba aktividade feto sira nian, maibé sira mós presiza osan hodi fo apoiu. SE hatutan tan katak durante ne’e SEPI sempre loke matan ba preokupasaun feto maluk sira.
