Movimentu Defende Dignidade Mulher Timor-Leste (MDDMTL), liu husi koferensia da imprensa eziji ba Secretaria do Estado Promosaun Igualidade (SEPI) atu halo edukasaun sivika konaba lei kontra Violensia Domestika (VD) hodi redus asaun krimi ne’e iha rai laran.
“Ami husu ba Secretaria do Estado Promosaun Igualidade atu toma responsabilidade ba feto maluk sira ne’ebé mak ohin loron hetan violensia domestika iha ita nia rai,” Reprezentante MDDMTL, Agustinha Moniz hato’o ba jornalista sira iha koferensia de imprensa semana kotuk.
Tuir Reprezentante Moniz nia hare maske iha ona Organizasaun Naun Governamental bar-barak maka koalia konaba feto nia direitu, e governu rasik mós iha ona SEPI atu toma konta konaba asuntu feto, maibé realidade numeru violensia domestika la reduz ka hamenus no feto maluk sira sempre sai vitima ba atitudi mane sira ne’e.
“Hau hanoin diak liu lalika hakilar demais konaba direitu feto nian sekuandu ita rasik la hatene implementa lei kontra violensia hasoru feto maluk sira. Atu hamenus numeru ida ne’e presiza servisu hamutuk ho mane sira, atu nune’e numeru ida ne’e bele hamenus oituan,” nia informa.
Alien de governu sira mós apela ba ONG nacional no internacional atu hala’o mós edukasaun sivika ba lei Violensia Domestika hodi hamenus numeru kazus iha komunidade nia le’et.
“Bazeia ba ami nia piskiza ne’ebé mak ami hala’o iha fulan Outubro konaba violensia domestika ne’ebé as teb-tebes iha Timor-Leste, kada fulan sempre iha violensia domestika 30 to’o 40 [kazus],” haktuir koSalienta Agustinha.
