Governu TL Sei Harii Eskola Aleijadu

Estado Timor-Leste sei harii eskola alijadu hodi tau matan ba labarik difisiente sira tanba hare ba realidade ne’ebe iha labarik difisiente barak mak la asesu ba edukasaun tanba sira la fiar aan atu asesu ba edukasaun ho kondisaun ne’ebe diferente ho labarik sira neebe normal.

“Liu husi Governu ami Parlamentu mos sei husu nafatin ba oin atu harii eskola especial ida ba sira tanba bainhira iha eskola espesial ida ba sira entau ema la hamoe sira no sira sente livre atu simu edukasaun. Ne’e duni alin sira ne’ebe iha ne’e la bele sente diferente ho ema seluk,” hateteten Deputada Maria Paixão, semana kotuk (17/11), durante selebrasaun Loron Mundial ba Konvensaun Nasional Direitu Labarik ne’ebe selebra iha loron 20 de Novembru iha Asosiasaun Hi’it Ema Rae’s Timor (ASSERT), iha Becora, Dili.
Deputada Paixao apela ba inan-aman sira ne’ebe hetan oan ho kondisaun difisiente atu  tenke istima no fo liu domin ba sira hanesan labarik seluk ne’ebe normal tanba sira iha direitu atu hetan domin no edukasaun no labele halo deskriminasaun ba sira.
“Inan-aman sira tenke hadomi sira tanba dala ruma sira mak matenek liu,  Maromak fo hela difiseinte ba sira, maibe sira  iha intelijensia ne’ebe uniku ho ema normal atu lori nasaun ne’e ba oin.”
Iha parte seluk Director ASSERT, Francisco de Deus Soares, hateten, sente orgullu tebes ho deklarasaun ne’ebe hato’o husi Deputada Maria Paixão tanba ho inisiativa ida ne’e bele hadia futuru ema difisiente sira nian.
“Hau hanoin planu governu atu harii eskola ba ema difisente sira ne’e positivu tebes tanba bele hadia liu tan futuru ema difisiente sira ba oin,” hateten Director Soares.
Iha lidun hanesan actual Sekretario Estado Asistensia Social e Desastre Naturais, Jacinto Gomes De Deus, hateten katak eskola ba difisiente ne’e inportante tebes tanba Timor-Leste seidauk iha eskola difisiente.
“Durante ne’e ami fo apoiu ba organizasaun balun hanesan AGAPE atu hanorin alin difisiente sira ne’ebe lahatene koalia entau se iha planu atu harii tan eskola difisiente ida hodi harii departamentu–departamentu entau kapas,” hateten SE de Deus.
SE De Deus hatutan tan katak parte Parlamentu mak propoin ba kestaun ne’e diak  se parlamentu mak la propoin governu mos sei hare ba kestaun ne’e iha tempu ne’ebe badak konaba rekursus umanu no katak sei iha sosiedade sivil balun mak iha vontade atu ajuda.