“Mais ou menus 20 pessoas mak sei aranka iha fulan Dezembru agora. Tes hotu ona, hein deit kompleta dokumentus maibe ida ne’e seidauk to’o. Tinan–tinan ita haruka hela deit tanba Centru Saúde hotu presiza mediku dentista entau mediku dentista ita falta. Laos mediku deit maibe infermeirus mos menus tanba Timor–Leste agora iha infermeirus dentista nain 33 fahe la to’o ba centru saúde hotu,” hateten Director Geral (DG) MS, Agapito Da Silva Soares, semana kotuk (14/11) iha edifisiu MS, iha Caicoli, Dili.
DG Da Silva hateten tan katak alende mediku dentista haruka mos mediku farmasia, hamutuk 100 mak sei aranka iha fulan dezembru no halao estudu iha Indonesia konaba area dentista, farmasia no areas seluk-seluk tan.
Director Soares hatutan katak tuir peskiza ne’ebe parte MS halo iha eskola rua iha Dili laran kuaze labarik 65 pursentu nehan aat.
Iha lidun seluk Deputado Francisco Jeronimo, Komisaun F, ne’ebe trata kona asuntu Edukasaun, Saúde no Kultura iha Parlamentu Nasional, hateten katak ho inisiativa ne’ebe estado Timor-Leste foti liu husi MS atu haruka estudantes sira ba foti mediku dentista nian ne’e inisiativu ne’ebe diak no inportante tebes tanba iha rai laran povu barak mak sofre moras nehan.
“Hau hanoin dentista ne’e inportante tebes tanba ema bar-barak mak moras nehan entau ita tenke presiza duni mediku dentista atu bele fo asistensia ba ita nia povu,” dehan Deputado Jeronimo.
