Heroi sira 12 de Novembru sai hanesan inspirasaun ba Joventude Timor-Leste atu luta ba indepedensia nasaun nian. Joventude lubuk ida mate iha Semiterio Santa Cruz loron 12 de Novembru 1991. Ho rajaun ida ne’e governu Timor-Leste liu husi Sekretaria Estado Joventude no Desportu (SEJD) akredita loron 12 de Novembru loron nasional ba Joventude.
“Masakre 12 de Novembru 1991 ne’ebe ohin ita selebra tinan rua nulu especial iha ita nia istoria tanba primeiru vitima maioria husi Joven, balun ne’ebe horiseik simu kondekorasaun momentu ne’eba sira tinan 15 no 17 anos,” dehan Presidente da Republica, Jose Ramos Horta, iha nia diskursu selebrasaun loron masakre 12 de Novembru iha Santa Cruz, semana kotuk (12/11), iha Dili.
Presidente Horta hatutan katak justisa ba Masakre 12 de Novembru 1991 sei akontese bainhira sosiedade sivil no orgaun seluk lao no hametin demokrasia. Hanesan Indonesia, nia dehan neineik–neineik sira nia orgaun kompetente rasik mak sei bolu autor krime sira ba justisa.
Laos iha Timor-Leste deit maibe iha tanjung Priok, Aceh, no iha nasaun seluk wainhira autor krime ba Tribunal tanba sosiedade sivil Indonesia sira nia luta. Nia informa katak inportante mak labele haluhan vitima hotu-hotu hanesan vitima 7 de Dezembru no Craras iha Distritu Viqueque.
“Serimonia ohin ita selebra atu fo onra ba vitima sira ho promesa ida ne’ebe ita hotu-hotu sei halo para violensia labele mosu iha nasaun laran, hametin unidade hahu husi lider hotu husi Presidente Republika, Poder Ezekutivu, Poder Legislativu no poder judisiariu atu kria kondisaun atu hatun kiak iha Timor-leste,” dehan Presidente Horta.
Iha oportunidade ne’e Presidente mos hato’o agradese ba jornalista estranjeiru, Max sthal ne’ebe halo filmazen masakre 12 de Novembru ne’ebe fanu mundu internasional hodi fo atensaun ba Timor-Leste nia luta.
Iha fatin hanesan membru Organizasaun Mate Restu, Dionisio Da Silva alias Ani Bidau hateten katak joventude kontinua sai nafatin kontinuadores atu halo mudansa ba buat hotu-hotu no katak hakarak nasaun ba oin tenke komesa ho buat ne’ebe los.
“Ita bolu nafatin Maun bo’ot sira para hamriik no lori justisa tuir povu nia hanoin laos atu benifisia fali ema seluk maibe tempu to’o ona atu ita koalia sira bele matan dukur fanu sira nafatin fo hanetene sira buat ne’ebe los” dehan Anin Bidau.
