Tuir Membru Parlamentu Nasional balun promesa hosi Governu atu inaugura monumentu ba vitimas Massacre 12 Novembru 1991 molok loron iha tinan 2011 seidauk bele realiza maske Estadu gasta ona $50 mil hosi Orsamentu Estadu Jeral ba 2011 atu halo estudu viabilidade no dezenhu ba Monumentu 12 Novembru.
“Hau lembra hela bainhira aloka orsamentu proposta husi bankada FRETILIN ninian katak, iha sinquenta mil nebe aloka atu husu para halo estudu viabilidade ida, konaba Monumentu 12 de Novembru nian oinsa,” hateten Deputadu Inacio Moreira, FRETILIN, iha Parlamentu Nasional foin lalais (26/10).
Deputado Moreira hateten dala ruma Komite 12 Novembru halo tiha ona dezenhu ba Monumnetu 12 de Novembru trata hotu tiha ona.
“Agora importante mak ne’e, Governu ne’e iha ninia responsabilidade ka lae, para halo transferensias ruma para halo monumentu ne’e ka lae.”
Nia hatutan tan katak monumentu 12 Novembru iha ona planu atu halo, mais to’o agora seidauk realija, no katak tuir promesa nebe Governu halo, iha loron 12 Novembru Governu hakarak monumentu pronto tiha ona atu inagura.
“Mas iha ne’ebe, ne’e mak ami hakarak atu husu orsamentu nebe aloka ne’e para atu halo estudu de biavilidade.”
Entertantu Deputadu Arao Noe, CNRT, hateten hari monumentu laos iha Dili deit, maibe iha subdistritu sira monumentu komesa hari dadauk ona.
“Orsamentu ba hari memorial juventude sira liu liu ba 12 Novembru, orsamentu pakote ida deit,” Deputadu Noe katak.
Nia lamenta mos katak hari monumentu 12 Novembru nian iha Santa Cruz Dili seidauk hahu.
“Mas ita hare katak, besik loron sanulu resin tan ita atu tama ona ba komemorasaun tinan sanulu ba 12 Novembru nian,” Deputadu Noe dehan.
Nia hatutan tan katak, iha diskusaun Orsamentu Jeral do Estadu 2011 nian promete katak atu hahu konstrusaun no inagurasaun bele monu iha 12 Novembru 2011 maibe realidade agora seidauk hahu.
“Tanba ne’e mak ami mos lamenta oituan konaba situasaun ida ne’e, mas hau hanoin ninia impaktu tanba saida mak seidauk hahu Governu mak iha knar atu responde.”
Enkuantu Deputadu informa katak parlamentu preve tiha ona orsamentu ba 12 Novembru nian saida,” Domingos tenik.
Tuir informasaun nebe Deputadu Domingos da Costa hetan katak Komite 12 de Novembru atu harii monumentu antes tama ba komemorasaun loron 12 Novembru nian iha 2011.
Wainhira TDW koko konfirma asuntu ne’e ba iha Komite 12 Novembru maibe prezidenti Grigorio Saldanha la iha fatin.
