“Estadu la konsege hasai entaun nia dehan katak hau iha Grupu Artemarsial ida iha hau nia kotuk, hau Igreja ida iha hau nia sorin, pronto halo baruliu tun sae,” hateten Deputadu Tilman foin lalais (26/10), iha Parlamentu Nasional, Dili.
Deputadu Tilman hateten tan katak Eepublika Demokratika Timor-Leste ema hotu hotu nian.
“Ne’eduni ema nebe okupa uma Estadu, kuandu Estadu dehan sai, tenki sai.”
Nia hatutan tan katak laos familia ida ka rua iha fali Estadu nia leten tanba Lei hateten ema nebe okupa rai no uma estadu wainhira Estadu autoriza wainhira Estadu hateten sai, sai deit laos husu no hetan fali kompensasaun.
“Eis propriasaun sim senhor, hanesan hau nia Fatubesi neba, hau nia Avo sira nia rai mak ne’e, Estadu hakarak halo Hospital iha ne’eba husu hau, hau fo, problema la iha,” haktuir Deputadu Tilman.
Nia esplika se wainhira husu rai nain mak la fo, estadu foti bele selu.
“Laos ida ba Tasi-tolu neba nakonu, hatene katak, rai ne’e laos sira nian, depois tur tiha neba, agora Estadu tenki selu hau.”
Alende ne’e Deputadu Arao Noe, CNRT, hateten tuir lolos ema nebe okupa rai Estadu no husu lisensa ba estadu, wainhira estadu haruka sai mak foin bele negosia. Ida nebe okupa rai, Estadu la fo lisensa tuir lolos Estadu la iha negoseia ba sira.
“Hau la hatene los ita Timor hakarak saida lolos mak ida ne’e. Tanba ne’e mak ita tama la husu lisensa ita sai mos hanesan ema hasai, labele katak, tama sem lisensa, I depois kuandu atu sai eziji tenki fo kompensasaun, tenki ema fo indiminizasaun hotu,” hateten Deputadu Noe.
Nia informa katak se ema hotu kontinua nune’e nafatin prosesu dezenvolvientu sei la lao ba oin.
Deputado Noe haktuir tan katak Lei Bens Imoves bele regula sasan estadu nian.
“Lei Bens Imoves hateten klaru neba katak sasan nebe Estadu nian, Estadu Portugues no Estadu Indonesia rai hela, ne’e nasaun ninian,” nia informa.
Deputadu Noe hateten tan katak Lei Bens no Imoveis hodi kontrola ba sasan Estadu nian maibe durante ne’e falta de kontrolu.
