Dala barak ona labarik ho idade minoridade (tian 17 mai kraik) involve aan iha aktividade kampania partido politiku iha teritorio tomak no halo mosu debate iha sosiedade laran kona ba responsabilidade atu prevene sira involve aan iha politika ho tinan kik se nian lolos.
“Inan aman sira tenke kontrola sira nia oan hodi la bele involve aan iha kampania partido politiku sira hodi nune’e oan sira la bele monu ba dezastres tanba biasa kuandu iha fatin ne’ebe halo aktividade rame ne’e sempre hetan dezastres hanesan soke, ida ne’e mak ita evita,” hateten Deputado Paulo de Fatima Martins semana kotluk (18/10), iha Parlamentu Nasional, Dili.
Deputado Martins hatutan katak labarik sira ne’ebe involve aan iha kampanha partido politikus sira iha parte ida sira tuir tamba aktividade rame maibe karik akontese buat ruma ne’e responsabilidade inan aman sira nian tanba falta kontrola ba sira nia oan.
Iha fatin hanesan Deputado Martins hateten mos ba partido politiku sira hotu katak bainhira halao kampanha ruma tenki fo hatene uluk ba polisia sira para hodi bele halao seguransa masimu ba ema hotu hodi nune’e partidu politiku sira ne’ebe halao nia programa mos lao normal no sidadaun sira seluk ne’ebe halao nia servisu ho normal.
Entretantu komunidade Domingos Gonsalves hateten katak nia parte konkorda ho Deputado katak labarik sira ne’ebe involve aan iha aktividade partido politikus se hetan akontesementu ruma la os tau todan ba partidos politikus sira ne’ebe halao aktividade partidos nian maibe ne’e responsabilidade inan aman sira nian.
“Husu ba inan aman sira toma atensaun ba labarik sira ne’ebe sei ho idade minoridade, 17 mai kraik, atu labele involve aan iha aktividade partidos politikus sira atu evita sira husi dezastre,” hateten Gonsalves, iha Lecidere, Dili.
