Organizasaun Naun Governamental (ONG) internasional Caritas Australia realiza treinamentu Treinu sai Treinador (TOT) ho tema Peace Building/Community and Family Violence Prevention ba parseiru ki’ik hat Organizasaun Sosiedade Sivil (OSS) atu kapasita sira sai treinador hodi bele ajuda Caritas habelar informasaun iha rai laran konaba Direitu umanu, Direitu Feto, Igualidade Jeneru no prevensaun Violasaun Seksual tanba komunidade iha area rurais falta koinesementu ba topiku sira ne’e.
“Ami fo TOT ba sira hodi bele kapasita sira oinsa parseiru sira ne’e sai treinador no ajuda ami habelar informasaun ba komunidade ne’ebe iha sira nia area servisu liu-liu konaba direitu Feto, Direitu Umanu, Igualidade Jeneru no prevensaun violasaun seksual hodi bele hamenus violasaun seksual no diskriminasaun ba feto,” hateten Team Leader no mos Treinador Carolino Gonzaga Marques, semana kotuk (19/10), iha Ex Seminario Dare, Dili.
Formador Marques hatutan katak parseiru ki’ik hat ne’ebe sai hanesan Caritas Australia nia tilun no ibun hodi habelar informasaun iha baze mak organizasaun FUNDEF, organizasaun Knua Habelar Comunidade (KHC) Viqueque, organizasaun Centro Feto Haburas Dezenvolvimentu (CFHD) Baucau, no Forum Peduli Wanita (FPWO) Oe-cusse.
ONG Caritas Australia mos fasilita parseiru sira ne’ebe sai treinador hafoin tuir treinamentu atu bele prepara sira nia modulo treinu ida no planu hodi bele fo treinamentu ka fahe informasaun no inplementa topiku ne’ebe sira hetan iha treinamentu ne’ebe Caritas oferese ba komunidade sira ne’ebe sira rasik identifika iha sira nia distritu no sub-distritu liu-liu kona ba topiku prevensaun violensia seksual.
Formador ne’e mos hatutan tan katak treinamentu ne’e importante tebes ba Caritas Australia no sira garantia katak sira nia parseru sira ne’ebe hetan ona oportunidade atu tuir treinamentu ne’ebe sira organiza bele fahe no habelar informasaun ba iha komunidade iha area rurais no Caritas Australia rasik sei halo monitorizasaun ba parseiru sira nia inplementasaun iha baze.
Treinamentu ne’ebe halao durante loron lima iha Dare, Caritas Australia uza fundus rasik ho montante rinhun hat resin hodi fo kapasitasaun ba sira nia parseirus.
Entretanto Rita Valentina Pires, nudar Organizadora ba programa treinamentu hateten katak treinamentu ne’ebe Caritas Australia realiza ne’e inportante tebes ba parseiru hat ne’ebe tuir tanba parseiru hat ne’e parseiru foun Caritas Australia nian entau sira sei menus koinesementu ba material direitu feto, direitu umanu, Igualidade Jeneru no prevensaun violasaun seksual.
“Ho ida ne’e mak ami Caritas Australia konvida sira partisipa iha treinamentu basiku ne’ebe ami iha atu sira bele inplementa sira nia programa iha baze,” hateten Korneadores Pires.
Caritas Australia hanesan Agensia Katolika ne’ebe fo nia ajudus internasional iha aread dezenvolvimentu ba nasaun hot-hotu iha mundu. Caritas Australia rasik hahu nia servisu iha nasaun Timor leste iha tinan 1999 ho objetivu atu ajuda hakbi’it no dezenvolve komunidade sira atu hamri’ik hodi buka dalan rasik ba dezenvolvimentu.
Iha okaziaun hanesan Teresa Pereira, nudar Directora ba organizasaun Centru Feto Haburas Dezenvolvimentu (CFHD) Baucau, hato’o nia sentimentu bainhira nia hetan oportunidade atu tuir programa ne’ebe Caritas Australia oferese tanba liu husi treinamentu ne’e sira bele hatene klean liu tan konaba direitu feto no direitu umanu, igualidade jeneru, prevensaun violasaun seksual.
“Hau agradese tebes ba Caritas Australia tanba fo ona oprotunidade ba ami hodi bele tuir trainamentu ida ne’e no ami bele hatene klean liu tan konaba material sira ne’e hodi bele inplementa iha baze,” hateten Diretora Pereira.
