Tuir Ramila Da Costa, Manager Programa Uma Mahon Enklave Oe-cuse no Organizasaun Forum Peduli Wanita Oe-cusse (FPWO) katak durante ne’e ema barak kestiona katak direitu feto nian maibe realidade ema barak viola direitu feto tanba la fo oportunidade fa feto maluk sira iha area rural atu bele asesu ba iha informasaun no treinamentu ruma.
Manager Da Costa koalia hosi Ex Seminario Dare, durante tuir treinamentu Treinador ba Treinador ne’ebe oferese husi Organizasaun Naun Governamental (ONG) Internasional Caritas Australia, 17-21 Outubru 2011, kona ba oinsa bele bele hanoring treinadores habelar ba iha komunidade iha area rurais informasaun atu sira bele hatene sira nia direitu atu asesu ba edukasaun, no mos atu involve aan iha vida politika.
Material ne’ebe sira hetan iha treinamentu mak kona ba direitus umanu universal, Direitu feto, igualidade jeneru no prevensaun ba violasaun seksual no domestika.
Manager da Costa hateten katak hafoin hetan treinamentu iha Dare sira sei iha planu atu bele halo sosializasaun hodi habelar informasaun ba komunidade sira iha area rural konaba informasaun foun ne’ebe sira hetan iha treinamentu baTreinado sai Treinador hanesan prepara kapasiade organizasaun atu fasilita treinamentu ruma ba iha komunidade sira iha area rurais.
Entretantu partisipante Agostu Pinto, nudar Kordenador Jeral organizasaun Knua Habelar Komunidade (KHC) hateten katak direitu umanu ho direitu feto ne’e labele haketak maske iha diferensia tanba direitu umanu ne’e koalia konaba direitu universal no direitu feto hanesan sira iha direitu atu partisipa iha organizasaun ka vida politika.
“Ami iha koineshementu ne’ebe nato’on maibe ami hetan oportunidade atu tuir treinamentu ne’e no ami bele inplementa diak liu tan material sira ne’ebe ami hetan iha treimanetu ne’e atu bele kapasita ami atu fahe informasaun iha ami nia organizasaun no komunidade sira ne’be iha baze, liu-liu inan feto sira ne’ebe seidauk iha koinesementu ba material sira ne’e,” hateten Kordenador Pinto.
Nia hatutan tan katak papel organizasaun KHC mak atu kapasita no fo tulun ba ema ne’ebe bi’it laek liu-liu inan feto sira ne’ebe iha area rurais liu husi servisu hamutuk ho organizasaun hanesan Caritas Australia no fo tulun ba feto sira ne’ebe vunerabel ka vitima violensia domestika no violensia seksual.
