Eskola Sekundariu 05 de Maiu Becora, iha Dili, hanesan eskola publiku ne’ebe iha total estudate hamutuk 1.745 maibe to’o oras ne’e estudante sira sei preoukupa tanba falta meza no kadeira hodi hala’o prosesu aprendisajen ho diak.
“Ami senti preoukupa tebes ho kondisaun ne’ebe ami hasoru tanba difikulta ami hala’o prosesu aprendizajen ho diak tanba ho estudantes ne’ebe barak meza no kadera la to’o ba ami atu tur. Tanba ne’e ami husu ba governu ka orgaun kompetenti atu bele tau mata lalais mai ami nia eskola,” hateten Isabel Martins iha eskola fatin.
Iha parte seluk nia hatutan liu tan katak laos meza ho kadera deit maibe haris fatin mos laiha ho ne’e bainhira ami atu ba haris fatin laiha ami senti difikulta tebes bainhira ami atu ba haris fatin ami tenki ba eakola kotuk, ou se lae ami tenke halai fila deit ba uma tenik Martins.
Hatan ba preoukupasaun hirak ne’e diretur eskola 05 de maiu Manuel Verdial hateten katak sira haruka bebeik relatoriu no karta ba Ministeriu Educasaun maibe to’o agora seidauk hetan resposta.
“Fulan-fulan ami haruka bebeik relatoriu ba Educasaun no Parlamentu Nasional maibe la hatene relatoriu sira ne’e sira soe tia hotu ba sampa [lixu] ne’e mak to’o agora ami seidauk hetan rezultadu.”
Tuir Vise Presidente Komisaun F, ne’ebe trata Assuntu Edukasau, Deputadu Francisco Jeronimo katak sira halo bebeik monotorizasaun ba eskola hotu-hotu maibe realidade to’o agora la’os eskola balun deit mak seidauk hetan rehabilitasaun maibe eskola barak mak seidauk hetan duni rehabilitasaun.
“Ami halo bebeik fiskalizasaun ba eskola sira ne’e maibe kondisaun sei nune’e nafatin la hatene osan sira ne’e Ministeriu sira mak uza halo deit la hatene. Ita hein agora dadaun ami atu debate orsamentu ano fiscal 2012 sira sei aprezenta ba ita gastus sira ne’e ba saida deit,” hateten Deputadu Jeronimo iha Parlamentu Nasional, Dili, semana kotuk (11/10).
Iha fatin hanesan professor estajariu Luis Serafin de Deus husi Universidade National Timor Lorosa’e (UNTL), ne’ebe halo estajio iha ESP 05 Maio, hateten katak kondisaun eskola ne’e aat tebes la’os ba estudantes deit maibe ba professors sira mos hetan difikudades tanba fatin ba sira atu tur la iha no wainhira aula remata sira hamirik deit iha liur.
“Ami senti todan tanba kondisaun eskola ne’e la favoravel duni, no estudantes mos barak liu tanba ne’e difisil uituan ba ami atu kontrola estudante,” hateten Professor Estajiario Serafim iha Eskola fatin iha Becora.
Eskola Sekundaria 05 de Maiu Eskola Publika ho total estudante hamutuk 1475 no ba Primeru Ano iha salas walu, ba Segundu Ano salas hitu no ba Terseiru Ano sala walu.
Tuir dadus aprovasaun orsamentu ne’ebe aprova husi PN ba ME iha tinan ida ne’e (2011), total hamutuk $2.400 miloens inklui ba rehabilitasaun eskola, merenda eskolar, no ekipamentus eskola nian no seluk seluk tan.
Iha parte seluk wainhira jurnalistas koko atu konfirma assuntu iha leten ho Diretor enkarregue kona ba projektus reabiliasaun eskolas iha rai laran la konsegue tanba la iha fatin.
