Tuir Directora Escola Agape, iha Dili, Weni Fernandes katak focus liu ba Agape Foundation mak atu hanorin labarik defisiente sira tamba sira la iha assessu ba escola, dala ruma sira badio deit e balun hela deit iha uma sira hakarak atu escola maibe escola espesial ne’ebe bele hanorin sira la iha.
“Ami loke escola ida ne’e ba ema tilun diuk, no sira ne’ebe la hatene koalia inklui mos labarik sira ne’ebe defisiente,” hateten Directora Escola Agape Weni Fernandes semana kotuk (18/10) iha nia knar fatin Escola Agape, Delta 1, Dili.
Tuir Directora Escola Agape Fernandes escola ne’e loke iha Agostu 2004 no liu liu ba labarik espesial tilun diuk no sira ne’ebe la hatene koalia.
Ideias ba eskola ne’e mossu tamba Directora Fernandes no nia familia hatene koalia uza liman deit no sira koko buka ema ida deit husi sira nia vizinho no komesa hanorin nia no nia bolu nia kolega tan to’o ikus mai hetan duni professores sira hamutuk nain lima mak hanorin iha escola ne’eba e sira hanorin loron Domingo deit.
Enkuantu bainhira labarik sira ne’ebe defisiente komesa aumenta barak sira komesa halo prosesu aprendizasen ne’e iha loron tersa no quinta. Maibe iha 2006 tamba problema krisis estudantes sira mos halai namkare hotu no iha 2007 wainhira situasan hahu normaliza oituan sira komesa fali escola e labarik sira aumenta barak.
Buat ne’ebe “ami hanorin ba sira maka material akademiku, siensia, matematika, oinsa le, konta numeru, oinsa hakerek, toka Sailafon (Hanesan Drum Band), Volly Ball, Tennis iha Bebonuk tamba hakarak prepara sira ba moris bainbain.
Total estudante ne’ebe iha hamutuk ema tilun diuk nain 42.
“Ami uza ami nia Garajen [Kareta para fatin], luan tan ne’e loron ami uza hodi halao prosesu aprendizasen e iha kalan kareta hodi para,” informa Diretora Fernandes.
Escola ida ne’e rasik la iha ema ida suporta no Diretora ne’e ho nia laen no oan rasik mak loke escola ida ne’e. Iha tinan 2010 Ministerio Solidariedade Sosial (MSS) hahu fo suporta to’o agora.
Nia informa katak escola ida uniku no la hanesan escola sira seluk iha Timor tamba escola ida ne’e nia prosesu aprendizasen koalia uza liman no escola ida ne’e rasik foin mak rua deit ida iha Fatumasi no ida mak iha Delta 1.
Iha parte seluk Vinildio Carvalheira, nudar estudante ida hosi Eskola Agape hateten katak nia sente kontenti tamba nia bele hetan escola espesial ida at nune’e bele hanorin sira tuir prosesu aprendizasen hanesan ema normal sira aprende.
“Hau ki’ik hakarak tebes atu ba escola no hau nia inan aman hatama hau ba escola hamutuk ho ema normal sira. Husi ne’eba mestre sira esplika kona ba escola Agape escola ba ema tilun diuk no la hatene koalia. Fila uma hau mos hateten ba hau nia inan aman katak hau hakarak ba escola hamutuk ho hau nia kolega sira ne’ebe hanesan hau ema dezabilidade,” hateten estudante Carvalheira.
