Membrus Parlamentu Nasional preokupa tebes konaba reabilitasaun Ponte Bucoli, iha Distritu Baucau, nebe tau tiha ona orsamentu 2011 maibe ate agora la lao.
“Ponte Bucoli ne’e osan tau tiha ona. Uluk ema bok tiha ona I tanba sa mak paradu agora mak foin tau fali iha ne’e, foin mak halo mobilizasaun ho razaun saida” hateten Deputada Josefa Alvares Soares, FRETILIN, iha parlamentu semana kotuk (13/10).
Deputada Soares hateten katak familia uma kain ida nebe hela besik iha Ponte ne’e sofre liu tanba loke estrada foun movimentu transportes liu ba mai halo rai rahun suar halo familia uma kain ne’e sofre liu.
“Rai rahun sae iha ninia uma sai mutin tiha deit ona, tan deit Ponte ne’e.”
Entertantu Sekretariu Estadu Obras Publikas, Domingos Caero, hateten katak Ponte Bucoli horas ne’e dadauk sei iha prosesu mobilizasaun nia laran.
“Tanba ida ne’e mak ami halo hela previzaun ate 31 de Dezembru nia so to’o deit 15 pursentu neba,” hateten SE Caero.
