“Ita bot sira mak fo hatene mai ami katak Hot Mix ida agora tesik iha Mandiri nia oin dehan diak liu, maibe hau kompara deit ba iha Bairo Pite ba Hudi laran neba, la to’o fulan ida ka rua taka fali deit,” hateten Deputadu Adriano do Nasimento, membru Komisaun G, iha Parlamentu Nasional, Dili, semana kotuk (13/10).
Tuir Deputado Nascimento katak, nia la fiar ona estrada iha Dili laran katak halo ho Hot Mix tanba estrada iha Hudi laran taka kuak ho regular liu.
Alende ne’e Prezidenti Komisaun G, Pedro da Costa, hateten katak, Estrada Dili laran nebe mak nafatin kuak ba mai tanba manutensaun rutina ko manutensaun periodika la iha.
“Nebe ita hakilar–hakilar mas sira la iha osan atu haruka ema hadia estrada sira ne’e, entaun estrada sei aat nafatin deit” dehan Prezident Komisaun G da Costa.
Tuir nia katak tenki tau orsamentu ba manutensaun rutina no manutensaun periodika atu nune’e bele proteje estrada la bele aat ba bebeik.
“Tenki aloka orsamentu ba iha manutensaun rutina ho manutensaun periodika alende ne’e mos atendimentu emerjensia ninian, tanba orsamentasaun iha 2012 nian la iha.”
Entertantu Secretariu Estadu Obras Publikas, Domingos Caero, hateten katak, estrada husi Hudi Laran mai to’o Palacio Prezidenti da Republika, estuds kompletu ona.
”Ami halo husi bundaran [rotunda] Lafatik mai to’o mai to’o iha Palacio Prezidenti nian para atu rezolve asuntu ida ne’e,” hateten SE Caero.
Nia hateten iha tinan rua ka tinan tolu ba kotuk mak estrada iha neba kuak loro loron.
“Foin dadauk tinan liu ba mos ita la hetan ona maibe hanesan Ministru dehan tanba nia durasaun liu se ita hakarak reabilitasaun ita tenki halo reabilitasaun total.”
