“Ema hanesan ne’e ita sei la bele uza tan tur sai hanesan Sekretariu Estadu ba iha Eletrisidade,” hateten Xefi Bankada ASDT, Domingos da Costa, iha Parlamentu Nasional, Dili, semana kotuk (19/20).
Tuir Deputadu da Costa katak, se karik nudar ema, ema hakilar ita dala ida ka dala rua tenki iha mudansa ruma.
“Mas to’o ohin loron buat ida ne’e desde uluk kedas to’o agora mak ida ne’e hela deit,” hateten tan Deputado da Costa.
Nia haktuir katak la os deit Januario Pereira mak los atu servisu iha pozisaun Secretario Estadu ba Eletrisidade, Agua e Urbanizasaun.
“Tuir lolos nia tenki rezigna a’an, hatama fali ema seluk,” hateten Deputado da Costa.
Entertantu Deputadu PSD, Mario Viegas Carascalao hateten durante tinan hat nia laran programa eletrisidade no be mos lao ladiak duni.
“Tanba durante kuatru anus ita promete bara-barak ba povu mais depois to’o ohin loron AMP nia mandatu atu remata ona, ahi kontinua mate loron kalan,” hateten Deputadu Carrascalao.
Nia haktuir katak dala ruma parlamentu rasik mos la halao nia servisu tanba ahi mate la iha ema ida atu kontrola.
“Iha Same be nia hun mak neba mais iha vila laran be la iha. Hanesan mos eletrisidade iha Dili rasik loron-loron mate dala hat dala lima.”
Tuir nia katak, atu rezigna a’an Sekretariu Estadu Januario Pereira, so Primeiru Ministru Xanana mak avalia, maibe nia nudar Deputadu la iha kompetensia atu avalia tanba nia iha liur tiha ona hosi nia kargu uluk hanesan Vise Primeiru Ministru.
“Ita iha liur bele hare aspetu ida deit, ita bot sira bele husu ba Primeiru Ministru tanba sa mak situasaun ahi hanesan ne’e no situasaun be hanesan ne’e, ita bot mantein nafatin Sekretariu Estadu, nia mak bele hatan,” Deputadu Carrascalao dehan.
Wainhira TDW, koko konfirma asuntu ne’e ba iha Sekretariu Estadu Eletrisidade Agua e Urbanijasaun maibe SE Pereira la iha fatin.
