Tuir Community Base Rehabilitation (CBR) Asosiasaun Hi’it Ema Ra’es Timor (ASSERT) Josefina Dhikdhak Bandala katak oras ne’e dadaun total labarik alezadu ho idade eskolar ne’ebe asesu ba edukasaun iha Ensino Baziku hamutuk na’in 185.
“Ne’e tuir data base labarik alezadu ne’ebe hela iha ne’e maske antes ne’e labarik barak mak la ba eskola maibe ami halo hela programa follow up e barak mak agora asesu ona ba edukasaun iha ensino baziku publiku nian,”informa Dhikdhak Bandala semana kotuk iha nia knar fatin Becora,Dili.
Kona-ba labarik alezadu ne’ebe oras ne’e sei hela ho nia inan-aman sira,liu-liu sira ne’ebe ho idade eskolar maibe la eskola ASSERT sei hare mos sira ne’e.
“Sira tenke rejistu iha ASSERT nune’e bele hetan asistensia, ami sei kapasita sira saida mak sira presiza, karik sira lao labele ami fo ezersisiu atu sir abele la’o no bele asesu ba edukasaun,”nia katak.
Atu hatene liu tan labarik alezadu nain hira mak asesu ona ba eskola no sai husi eskola, ASSERT koko hasoru malu ho director eskola,profesores sira inklui inan-aman nune’e bele lista sira .
“Ami mos la para iha ne’e deit sira ne’ebe servisu iha sosial ,sei hare labarik sira ne’e asesu hotu ona ba escola ka lae,”nia dehan.
Iha parte seluk membru CBR, Nelia Boavida Freitas hateten ASSERT kontinua halo follow up kona-ba labarik alezadu ne’ebe atu tama ba eskola, sira ne’ebe eskola ona inklui sira ne’ebe droup out husi eskola.
“Ami seidauk hatene lolos lista kona ba labarik alezadu nain hira mak ba ona escola no mos hira mak sai tanba agora iha hela prosesu rekolha dadus maibe iha mos defisiente ho problema fiziko ne’ebe mak ami tangani ne’e barak iha ona escola publiku , ami nia organizasaun ida ne’e mos prepara hela labarik sira ne’ebe mak atu ba escola,”nia informa.
Kona -ba materia ne’ebe hanorin ba labarik sira ne’e mos hanesan hotu tuir kurikulum Ministeriu Educasaun (ME) nian.
Entertantu tuir Vise Prezidente Komisaun F Parlamentar Francisco Jeronimo katak edukasaun ba ema hotu tantu ema defisiente no ema normal, maibe governu presiza kria kondisaun ba ema alezadu sira ne’ebe presiza atensaun.
“Ne’e obrigasaun governo nian atu bele tau matan ba sira tanba ne’e servisu hamutuk ho Ministeriu Solidariedade para hare kondisaun sira ne’e, bele fo asesu educasaun ba ema hotu liu-liu sira ne’ebe mak alezadu,”nia dehan.
