“Tempu agora udan ona, se ita hakarak ba Dili tenki dada kareta mak foin to’o iha Dili. I mai fali mos hanesan ita tenki dada kareta mak foin to’o Uma” hateten Armando da Silva, iha Merkadu Atsabe, semana kotuk (6/10).
Da Silva hateten tan katak iha nia Subdistritu Atsabe kareta halai iha neba mesak trek ho Bis deit maibe kareta sira seluk la ba iha neba tanba tauk estrada at.
“Ami lori ami nia kafe ba iha Dili saku ida selu Kareta $7.50 tanba selu tuir estrada aat,” nia haktuir tan.
Komunidade husu ona dala barak ba Governu atu hadia lalais sira nia estrada.
“Ami husu ba Governu atu tau matan lalais baa mi nia Estrada iha subdistritu Atsabe ne’e,”Armando hato’o.
Entertantu Eusevio de Araujo reforsa tan katak, wainhira tempu udan komunidade Subdistritu Atsabe la bele tun ba iha Dili tanba tahu barak halo estrada at no halo xofe sira tauk lori kareta to’o iha ne’eba.
“Kareta mai iha ne’e ida ga rua hanesan ne’e maibe ita hakarak atu ba Dili tenki lori tali hodi dada kareta mak foin ba Dili no fila mai mos hanesan,” Eusevio dehan.
Nia husu ba Governu atu hadia lalais estrada ba Astabe atu nune’e sira bele lori sira nia produtu mai iha kapital Dili.
“Ami komunidade subdistritu Atsabe husu mak Governu atu hadia lalais ami nia estrada ne’e atu nune’e ami bele lori ami nia produtu ba iha Merkadu,” nia tenik tan.
