Semana ida ne’e wainhira ami edit notisia kona ba infeksaun HIV/AIDS iha Timor-Leste ami preokupa primeiru tanba ami nia jornalista rasik wainhira halao kobertura ba assuntu ne’e la komprende katak moras HIV/AIDS moras seriu no moras halo mate ema, no segundu liu hosi ami nia fontes ne’ebe hili atu hamamar impaktu moras ne’e no koalia liu kona ba tratamentu doke natureza assassina moras HIV/AIDS.
Nudar jornalistas ami iha responsabilidade atu informa, eduka no hakolok ami nia audiensias. Kona ba moras HIV/AIDS la iha haksolok.
Saida mak preokupa ami (editores) in notisia iha ne’e mak maske ami informa ami nia leitores kona ba moras HIV/AIDS, ami mos falha atu eduka.
Maibe ida ne’e mos komplikadu baa ami tanba bele ka lai jurnalistas eduka massas liu hosi ami nia notisias ka liu liu ami nia funsaun atu informa deit? Perguntas ida ne’ebe jurnalistas hotu sei husu nafatin tempu kleur ona.
Kona ba isu HIV/AIDS saida mak preokupa ami mak notisia fraku los atu hatoo mensajen baa ami nia leitores katak HIV/AIDS moras ida ne’e sei oho sira ne’ebe daet ona virus HIV nune katak moras ne’e serious los.
Maske iha ona avansus barak kona ba tratamentu ba ema ne’ebe infekta ho virus HIV, seidauk iha kura ida. Ema ne’ebe moris ho virus HIV tenki hemu aimoruk lor-loron ba vida tomak (liu aimoruk musan 10 lor loron) no sei mate tanba infeksaun ne’e – Mensajem mak ne’e.
Notisias fraku tanba mos hosi parte ami nia fontes no ami nia jurnalista sira hanesan la hakfodak kona ba virus HIV no moras AIDS no nia signifikadu.
Ida halo ami hanoin saida mak akontese ba kampanha hasoru infeksaun HIV no alerta ita nia populasaun barak joven kona ba perigu halao moris sexual ho parseirus oin oin no la hatene kona ba uza kondom. Fotografias ema moris ho HIV no mate ho AIDS atu sensibiliza populasaun iha ne’ebe? Timor-Leste presiza kampanha aktiva ida kona ba prevensaun HIV/AIDS.
Perigu iha ita nia leet ona, subar iha igoransia nia kotuk, no karik ita la serius kona ba eduka iha nia populasaun kona ba virus HIV ita sei tau mos iha perigu ita nia dezenvolvimentu aban bain rua.
