Semana ida ne’e notisia importante liu mak alegasaun kakat ema ruma besin ema boot ruma iha lideransa Timor-Leste hetan kaer lori iha pasta laran US$400 milhares wainhira koko atu tama iha Australia liu hosi Darwin.
Ema ida seidauk konfirma lolos kona ba rumores ne’e maibe ema ida foti sai idu ne’e iha Parlamentu Nasional, Deputadu Paulo Martins, CNRT. No nia nudar eiz Komandante Jeral Polisia Nasional Timor-Leste, PNTL, nudar fontes kredivel ida.
Iha mos rumores katak informasaun nia hetan liu hosi blog iha iha internet no ita hotu hatene kona ba informasaun liu hosi blog ita presiza tetu didiak, bele fiar ka la’e. Maibe wainhira Deputadu Martins foti isu ne’ebe iha Parlamentu Nasional, isu ne’e sa’e notisia boot no tanba ida ne’e ami tau iha Pajina Dahuluk.
No mos kona ba rumores ida ne’e la os primeira vez mak osan koko atu halai ba Australia no ema ruma kaer toman koko atu lori ossan barak liu hosi Darwin iha pasta laran.
Husu deit autoridades Australia nian sira konserteza hatene kona instansias hirak mak akontese ona. Maibe sira mos nonok deit kona ba situasaun hira ne’e atu evita eskandalu internasional no hamoe nasaun seluk. Isu hanesan ne’e rezolve iha odamatan diplomatika nia kotuk.
Molok ami print jornal diario seluk fo fai mos iha sira nia pajina dahuluk fotografia ema ne’e alega lori ossan halai ba Australia. Foto hatudu nia nega nia la ba Australia, nia ba Bali no nia hatudu visa iha passaporte atu prova.
Nune katak misteriu ida tan no karik ida ne’e mak destinu nasaun Timor-Leste. Buat hotu no saida saida deit bele akontese no ema hotu hatene maibe ema ida nunka konfirma no dala barak buat (bain bain buat aat) dasa ba iha tapete okos.
Regra mak husi tempu liu, aguenta deit no buat seluk sei akontese lalais atu taka buat ne’ebe foin akontese.
Se mak hatete katak moris iha ilha ida bosan/boring?
