“Merkadu ne’e halo tinan rua ona maibe ita nia populasaun sira la tama iha laran, e populasaun gosta liu mak merkadu Hali-laran no halo movimentu transportes nian sai problema bo’ot” kestiona Deputadu Francisco de Araujo husi bankada ASDT,iha plenaria semana kotuk (27/09) PN.
Tuir nia, la’os deit merkadu Taibesi maibe mos merkadu Comoro,populasaun sira la fa’an iha merkadu laran maibe fa’an fali iha liur mai. “Hau hanoin governu kompetente bele hare kestaun ne’e,”.
Deputadu ne’e hatutan, Governu loke merkadu bar-barak maibe negosiante sira la uza halo Governu fakar osan de’it.
“Ida ne’e mekanismu oinsa para ministeriu kompetente atu hare kestaun ne’e, se halo merkadu mak bibi,fahi mak toba fali iha laran, ne’e gasta osan saugate de’it,”nia preokupa.
Preokupasaun hanesan mai husi Deputadu Adriano do Nascimento husi bankada Partidu Demokrata (PD),katak merkadu barak iha Dili laran sai fatin ba animal no ema namora malu.
“Ne’e akontese iha hau nia distritu mos la uja ,se ida ne’e mak realidade ,hau husu ba parlamentu ba ita sira ne’e atu orsamentu 2012 oin mai Governu propoin atu halo merkadu karik diak liu ita koa ,labele halo liu,” Adriano dehan.
Nia hatutan, iha Orsamentu Jeral 2012 nian, karik govenru propoin ba buat ne’ebe ladun iha prioridade ba povu nia moris, tenke koa tiha.
