Maske dalabarak ona halo juramentu katak sei la halo tan konflitu maibe realidade joventude sira husi arte marsiais Persaudaraan Setia Hati Terate (PSHT) kontinua provoka situasaun hanesan akontese iha bairo Moris Foun C Comoro, komunidade sente lahakmatek ho hahalok joventude husi Beto Timur ne’ebe tuda jovens sira bairo ne’e.
“Iha Domingu dader (02/10) tuku 08:00 otl, warga PSHT sira ho 77 provoka malu iha bairo ne’e hodi tuda malu e halo ami la hakmatek no tauk,”hateten Mateus de Carvalho,komunidade Moris Foun C mota laran,semana kotuk (03/10) iha Comoro,Dili.
Tuir nia, problema arte marsiais nunka iha solusaun diak maske sira halo ona juramentu iha Crus Joven tanba realidade sira kontinua provoka malu,liu-liu iha tempu kalan.
Tanba ne’e Mateus husu ba orgaun kompetente atu bele tau seguransa iha fatin ne’e nune’e komunidade sira seguru bainhira tempu kalan. “Sira husi Beto ne’e mak sempre provoka,”nia katak.
Entertantu Prezidente Komisaun H Parlamentar Deputaduo Antonio Cardoso Machado,hateten provokasaun entre arte marsias tanba iha fator rua ne’ebe influensia sira atu provoka malu.
“Fator rua ne’e mak ida tanba eleisaun jeral besik dadaun ona inklui misaun ONU nian ne’ebe atu hotu ona no ida seluk tanba menus de kampu servisu,”nia dehan.
Tuir nia, arte marsiais hanesan parte kultura Timor-leste nian hodi promove kultura Timor nian iha nasional no internasional “la’os atu provoka malu,”.
Tanba ne’e hau husu ba orgaun kompetente resolve problema arte marsiais tenke tau ema ne’ebe iha prinsipiu neutral no imparsial no resolve ho solusaun ne’ebe sustentavel,”nia esperansa.
