Relasiona ho engrafamentu ba movimentu transportes ne’ebe husi loron ba loron aumenta, Diresaun Nasional Transporte e Terestres (DNTT) iha ona planu iha 2011-2020 lozas sira ne’ebe iha Dili laran labele halo tan estensaun iha rai mamuk maibe tenke halo andar.
“Husi bundaran merkadu lama to’o iha Kuluhun,ami preokupa teb-tebes tanba kareta nia para fatin mos la iha,ema la’o fatin mos kuaze ke atu laiha ona,”preokupa Xefe Interino Trafiku, Abel da Conceiçao semana kotuk (23/09) iha Balide, Dili.
Tuir nia,oras ne’e dadaun DNTT prepara ona planu hodi hato’o ba iha governu foun ne’ebe kaer ukun iha 2012.
“Se loja nain sira atu aumenta tan,tenke loke andar deit iha leten nune’e, iha kraik uza ba para kareta no fa’an sasan iha leten, nune’e bele fo fatin ba ema la’o ain movimentu transporte bele la’o ho diak,” nia afirma.
Entertantu tuir Deputadu Inacio Moreira katak, DNTT tenke halo planu ne’ebe mak integradu oinsa bele minimiza importasaun kareta sira ne’ebe mai fa’an iha Timor.
“Ida ne’e mos hau hare ba ita nia nasaun liu-liu iha sidade Dili ne’ebe ki’ik ,estrada mos ko’lot,kuandu kareta bar-barak maka halo engrafamentu maka’as,”Inacio dehan.
Inacio hatutan, ate agora Governu seidauk halo planu urbanizasaun ne’ebe diak, oinsa bele integra diresaun hotu-hotu ba nia fatin atu nune’e bele la’o tuir nia dalan.
“Hau rona ona informasaun katak, Governu ida ne’e mos halo tiha ona Marjen ida sira hakerek iha dekretu lei katak ,se ema ida iha osan nia bele fo ba ema sanulu ga rua nulu hanesan ne’e nia tau hamutuk nia bele mai fa’an fali (kompras veuklus privadus),” nia kestiona.
Enkuantu Deputadu Estanislao da Silva hateten ,ate agora Governu ida ne’e la fo atensaun ba transportes tanba la iha instituisaun ida ne’ebe mak toma konta hanesan Governu anterior kona-ba telekomunikasaun e transportes.
“Ne’e duni ita hare kareta sira halai iha Dili laran rungu ranga los ,la iha sinalizasaun,la iha regulamentu apropriadu,”Estanislao preokupa.
Ne’ebe lojas sira ne’ebe aumenta ba bei-beik ne’e tanba governu laiha planu kona-ba urbanizasaun oinsa mak bele organiza fatin sira ne’e.
