Tuir Prokurador Geral Repúblika (PGR) Moçambique nian, Dr. Augusto Raul Paulino, luta hasoru korrupsaun ne’e presiza leis adekuadas no apropriadas atu luta bele halo ho diak.
PDR Moçambique Paulino, haktuir katak prátika korrupsaun nudar krime hasoru humanidade, tanba ne’e presiza kontra hahalok a’at ida ne’e. Alemde estabelese leis apropriadas, presiza rekursus humanus hodi aprofunda liu tan kontra korrupsaun.
“Tanba ne’e mak hau iha ne’e hakarak koopera hamutuk ho Prokuradoria Geral Timor Leste hodi fahe experiensia oinsa funu hasoru korrupsaun,tanba aktu grave teb-tebes afekta ita nia Nasaun no hakiak povu,” hateten PGR Paulino iha semana kotuk (23/9) durante reuniaun alto nivel entre Komunidae Paises Lingua Portuguesa (CPLP) iha Dili.
Iha okasiaun hanesan Prokuradora Geral da Republika de Timor-Leste, Dra. Ana Pessoa Pinto, salient katak Moçambique sei koopera ho Timor-Leste iha área legislasaun, Informatizasaun no Formasaun.
PGR Pessoa Pinto haktuir katak iha Moçambique iha sentru de Formasaun jurídiku, ne’ebe oferese ba membrus CPLP nian, nune katak formandus Timoroan sira mos bele kontinua sira nia estudus magistraturas iha ne’ebe.
Entretantu Diretor Ezekutivu hosi Organizasaun Naun Governamental (ONG) Sistema Monotorizasaub Programa Judisiáriu (JSMP), Jose Luis Sampaio, afirma atu luta hasoru korrupsaun presiza ho esperitu kolektivo no servisu ho parseiru. No nis mos konsidera importante ba Procurador-Jeral Moçambique nia opiniaun atu enrikese, maske nune’e presiza mos konsidera natureza no kondisoesn aktuais Timor-Leste nian.
“Timor-Leste iha komitmentu atu kombate korrupsaun ne’e presiza servisu ho kolektivu, labele servisu mesa-mesak ka grupu ida de’it maibe, servisu integradu,” hateten Director Sampaio.
Nia haktuir katak Timor-Leste hanesan pais ida ne’ebe foin hamrik kompara ho Moçambique, tanba sira liu ona fase barak no ita foin iha fase estáziu nia laran no uza oituan ne’ebe iha hodi responde ba exizensia sira ne’e.
Iha okusiaun ne’e mos Presidente Komisaun Anti-Korrupsaun (KAK), Aderito de Jesus, hateten ekuipamentus sai fator importante hodi kombate pratika korrupsaun inklui rekursus Umanus. Niha haktuir tan katak importante seluk mos prepara rekursus humanus atu bele servisu hamutuk ho entidades sira ne’ebe servisu ba luta hasoru korrupsaun.
“Esforsu atu kombate korrupsaun tenke iha ekipamentus mos di’ak, hodi estuda telefone ita tenke prepara ema no ekipamentu atu estuda ba autoridade ne’ebe halo servisu ba kombate korrupsaun no oinsa suporta polísia,” hateten KAK Prezidente de Jesus.
Nia hateten tan katak atu kombate korrupsaun presiza estabelese kooperasaun ne’ebe di’ak entre KAK, Ministeriu Públiku, no sosiedade sivil no importante seluk maka partilla hamutuk rona esperiensua sira, desafius no opinioens hosi Nasaun seluk atu nune’e bele funu hasoru tipu krime.
