Tuir Diretor Comisaun Amizade Verdade e Rekonsiliasaun (CAVR) Agostinho de Vasconçelho katak, papel CAVR nian mak buka no rekolla informasaun kona-ba vitima sira durante okupasaun Indonezia husi 1975 to’o 1999 ne’ebe kompletu ho nia relatoriu hodi hato’o ba iha Governu no Estadu atu tau matan ba vitima sira ne’e.
“Hau hanoin CAVR seidauk halo buat ida ba vitima sira, maibe CAVR kontribui buat balun ba vitima sira mak prosesu kurativu (foti dadus sira ), depois hato’o ba iha ita nia governu nune’e bele tau matan ba vitima sira ne’e,”hateten Diretor CAVR ,Agostinho de Vasconçelho, semana kotuk (20/09) iha Balide, Dili.
Tuir gostinho katak, kontribuisaun CAVR durante ne’e mak buka informasaun no kompleta relatoriu hodi hato’o ba Governu no estadu.
“Oinsa mak bele ajuda ba vitima sira hodi dezenvolve sira nia moris ,ne’e estadu nia dever”Agostinho esplika.
Entertantu tuir Deputadu Francisco Branco katak, papel CAVR nian mak atu rekonsilia Timor oan rasik inklui ema balun iha Indonezia nian.
“Ita presiza halo rekonsiliasaun tanba ita moris iha funu naruk nia laran,ita moris iha konflitu ema barak mate entaun ita hadia fila-fali situasaun ida ne’e,” Deputadu ne’e dehan.
Tuir nia, atu hadia fila-fali situasaun iha pasadu presiza intende malu liu- liu entre Indonezia no Timor-leste atu nune’e bele la’o ba oin.
‘Ita bele la’o ba oin so ita hotu bele intende malu ,ita hotu fo liman ba malu,ita hotu rekonsilia ba malu hodi hare ba oin, “Branco katak.
Alende ne’e Deputadu Joaquin Amaral hateten, harii CAVR tanba konsekuensia husi responsabilidade Estadu Timor-leste nian atu hari lia los no hadia amizade entre TL no Indonezia.
“Tanba ne’e mak CAVR mosu husi konstituisaun iha despozisaun tranzitoriu atu hametin povu nia moris, tenke iha komisaun ida buka lia los atu kura kanek ne’ebe iha,”nia katak.
Tuir nia , agora misaun CAVR hotu e agora iha deit Comisaun Verdade Amizade (CVA) hodi kontinua servisu CAVR nian nune’e vitima sira durante 1975 to’o 1999 hodi hetan sira nia direitu.
“E espera katak lei reparasaun ne’ebe tama ona iha Parlamentu, tinan ne’e bele responde ona vitima sira nia halerik,”nia esperansa.
