“Tanba notifikasaun ne’ebe fo advogadu, prokuradoria, suspeitu inklui ba familia vitima ne’e la loos, tanba ne’e mak kansela,” hateten Advogadu Jacob Soares Martins semana kotuk (21/09) iha Pantai Kelapa, Dili.
Vitima Valdimir Lebre Coreia alias KUKA mate iha Salaun Delta Nova iha 28 Dezembru 2009 ne’ebe diskunfia tiru husi elementu Polisia Estasaun Comoro nian maibe to’o agora kazu ne’e seidauk halo julgamentu.
“Ema ne’ebe asasinatu ne’e krimi ida ne’ebe grave liu maibe tanba sa mak tribunal fo livre fali ema kriminozu sira ne’e,” hateten Advogadu Soares.
Tuir nia, bainihra kriminozu ida livre no hela deit iha uma, nia bele halo krimi ne’ebe hanesan ba ema seluk.
Tuir Prosesu Kodigu Penal, ema ne’ebe halakon ema seluk nia vida, bele hetan kastigu tinan 10 ba leten “Ita nia vida ne’e so Maromak deit mak bele hasai,” nia reforsa.
Iha parte seluk Diretor Ezekutivu Programa Monitorizasaun ba Sistema Judisial (JSMP), Luis de Oliveira Sampaio maske kazu ne’e atu tama ona ba tinan 2 nian maibe nia parte seidauk hatene informasaun klaru kona-ba prosesu kazu ne’e la’o oinsa.
“Sim ami laiha informasaun kona-ba kazu ida ne’e, ami hanoin katak kazu hotu-hotu ne’ebe tama ona iha Ministeriu Publiku ka tribunal nia meja presiza hetan rezolusaun tuir lei define,”nia hateten.
Tuir lei, iha prinsipiu ida ne’ebe presiza hare no halo tuir mak tenke halo julgamentu lalais, baratu no asesivel ba komunidade atu asegura katak povu fiar ba tribunal hanesan sentru ida atu hetan justisa.
“Ami lahatene kona-ba kazu ne’e tanba bai-bain sira hatama kazu ruma ba tribunal, ami nia kolega halo monitorizasaun no husu tuir kazu ne’e julga ona seidauk e ami laiha interese kona-ba kazu ida ne’e,” nia katak.
Entretantu tuir Julio Lebre Coreia, aman husi vitima KUKA katak parte familia konsidera kazu ne’e hanesan intervensaun politika ida ba sira.
“Se nune’e konserteza kazu ida ne’e sei la la’o tanba tuir ami nia hare hanesan iha intervensaun barak ne’ebe iha laran e iha pihak-pihak ne’ebe terlibat iha kazu ne’e nia laran e ami mos sei la nonok tanba kazu ne’e akontese dala barak ona ba joventude Timor oan sira sai vitima ba bei-beik husi ema ne’ebe la hatene tuir nia knar no kodigo disiplina polisia ninian ne’ebe halo hahalok ne’ebe la los,” nia lamenta.
