“Ita iha ona ro ahi 7 hamutuk ho ro Nakroma, tinan-tinan ita sempre hasai osan ne’ebe bo’ot tebes ba manutensaun ro ahi iha Surabaya-Indonezia, tanba ne’e diak liu orsamentu 2012 nian governu tau kedas hodi halo ofisina ro nune’e bele manutensaun iha ne’e,” hateten Prezidente Ramos Horta semana kotuk (26/09) iha serimonia lansamentu ro ahi 3 husi governu Korea ba governu TL iha Portu Dili.
Premiadu Nobel da Paz ne’e mos kestiona kona-ba ro ahi foun lubuk ida ne’ebe para deit iha loro manas laran iha portu Dili tanba laiha mahon.
“Ne’e politika governu nian para oinsa ro ahi sira ne’e para iha mahon hodi halo manutensaun tanba ita hamrik iha ne’e, ita hare ba portu maritime nia sorin ne’eba ro ahi lubuk ida mak laiha mahon ida,” Prezidente Horta hateten mos.
Presidente haktuir tan katak, nia parte koalia kestaun ne’e tinan ida resin ona ba Sekretariu Estadu Seguransa, Francisco Guterres, (SES) atu oins amak sir abele harii ofisina modernu diak ida para halo manutensaun ba viaturas sira “maibe besik tinan rua ona ita la hare ofisina ne’e.”
Entretantu tuir Embaixador Korea du Sul, Seo Kyong Suk katak Korea no Timor-leste nasaun ne’ebe iha era kolonialismu kuaze tinan 60 nia laran iha esperiensia rekonsiliasaun no unidade nasional.
“Hanesan mos iha independensia nia laran Timor-leste hatudu solidariedade nasional bainhira delegasaun F-FDTL tuir treinamentu iha Korea hatudu ona sira nia intelijensia no integridade iha korea,”hateten Seo Kyong Suk.
Embaixador Seo Kyong Suk esperansa katak iha future relasaun bilateral entre nasaun rua ne’e bele metin liu tan tanba esperiensia kolonializmu ne’ebe hanesan.
“Espera katak, buat sira ne’e hametin liutan ita nia relasaun iha area operasaun militar,ekonomia ,social ,kultura no selu seluk tan iha future, nia esperansa.
Tuir nia, objetivu oferese ro ahi tolu ne’e atu proteje rekursu tasi laran Timor nian, liu-liu bele hametin liu tan seguransa nasional.
Alende ne’e Vise Primeiru Ministru Jose Luis Guterres espera katak ho ajudus ro ahi tolu ne’e bele redus ona peska illegal ne’ebe sempre tama tasi Timor nian iha parte kosta sul.
“Tinan-tinan ita nia estadu lakon rekursu barak tanba de’it peska illegal, dala ruma ita rona dehan iha ita nia tasi iha peska illegal no trafiku illegal pesoas iha tasi tama barak ne’ebe mak komunidade internasional tomak kondena,” nia katak.
