“Tanba ne’e husu ba joventude sira tenke pasiensia ho situasaun nasaun Timor-leste ne’ebe sei iha limitasaun kampu de servisu no asesu edukasaun iha universidade mos limitadu no ema atu mengembangkan nia talentu mos terbatas,”hateten Prezidente CNJTL, Leovigildo Hornai semana kotuk (21/09) iha Farol,Dili.
Hornai mos rekonese katak konflitu ne’ebe mosu iha rai laran dalabarak kria husi joventude tanba jovens nia ran sei manas nomos menus vizaun oinsa atu analiza problema ne’ebe iha.
Tuir nia, iha mos faktores ne’ebe halo sira involve iha konflitu hanesan faktores internal, iha konesementu minimu hodi forma grupu apoia malu ba hanoin negative nian, laiha oportunidade atu dezenvolve aan iha familia laran, falta komunikasaun iha familia laran.
Enkuantu faktores external mak edukasaun ne’ebe sei minimu, menus kampu de servisu e parte seluk mos tanba konsellu joventude rasik ladun koalia ho joventude sira.
“Edukasaun mak tenke la’o, kriminal ita bele hatun no konflitu ne’ebe mosu entre joven sira ne’e individu tanba konflitu ne’e joven ida ka rua mak halo la’os presidente joventude no joven hot-hotu mak halo,” nia katak.
Atu halakon konflitu ne’ebe involve joventude, CNJTL sei kolabora ho inan-aman sira, lider komunitaria, edukador sira, organizasaun sira, reljiaun inklui governu no estadu, atu oinsa mak jovens sira bele resolve problema ho ulun malirin.
Iha parte seluk estudante husi Universidade Nasional Timor Lorosa’e, Fakuldade Enjeneria,Departementu Elektronika, Febriano Patricio hateten future nasaun ida ne’e iha joventude sira nia liman tanba ne’e jovens presiza kontribui buat ruma ne’ebe diak ba nasaun ne’e.
“Nudar jovens presiza loke ita nia neon atu evita aan husi kualker konflitus e hau hanoin iha dalan barak atu hases aan husi konflitu hanesan buka servisu, tuir formasaun rumano buat seluk ne’ebe ajuda ita atu forma aan hanesan joventude diak ida no bele fo kontribuisaun ba nasaun ne’e,”nia katak.
Iha parte seluk joventude Mario da C. Amaral hateten joventude inklui iha konflitu ne’ebe iha teritorio tomak ne’e influensa arte marsias nian tanba iha rai laran iha diferente arte marsias entau hamosu ona provokator konflitu.
